راشد بلوچ کج ءَ اِنت؟

نبشتہ کار: ازیز سنگھور

رجانک: بانڑی بلوچ

اسلام آباد ءِ سوچوکیں دگ ءُ پھازدارانی ترندی ءِ میان ءَ یک نرمیں توارے یکشل ءَ جسکگ ءَ اِنت۔ اے توار ماہ زیب بلوچ ئیگ اِنت کہ آ مرچی باندا زور بیگواھیں مردمانی کھولانی گون ءَ اسلام آباد ءَ زھرشانی ءَ نشتگ۔ آ پہ وتی بیگواھیں ناکو راشد بلوچ ءِ آجوئی ءَ لوٹ کنگ ءَ اِنت۔

راشد بلوچ یک وانندگ ءُ باسمائیں ورنایے آ پہ وتی کار ءُ روزگارءَ دبئی ءَ شتگ۔ 26 دسمبر 2018 ءَ چہ دبئیءَ آئی زوریں بیگواھی ءِ ھال اتکگ۔ آئی گھار پریدہ بلوچ ءِ گوشگ اِنت چیر اندری چہ دبئی ءَ پاکستان ءَ آرگ بوتگ ءُ آ اد ءَ بیگواہ اِنت۔

زوریں بیگواھی نوکیں گپے نہ اِنت بلے راشد ءِ جیڑہ پمشکا مزن اِنت کہ آ چہ دری سرڈگارے ءَ آوار جنگ بوتگ۔ اے کار نہ تھنا انسانی ھکانی بگیری اِنت بلکیں اے میان استمانی کانود ءِ تچک ءَ لگتمالی اِنت۔ پریدہ بلوچ آمیدگس، کمیشن، پریس کلب ءُ میان استمانی ادارھانی کِر ءَ شتگ بلے آئی ءَ انساپ نہ رستگ۔ آ مدام گوشگ ءَ اِنت اگاں راشد چونیں ھم میارباری یے کرتگ گڑا آمیدگس ءَ پیش کنگ بہ بیت۔ بلے اے بے تواری ءُ نہ منگ انساپ نہ زوراکی یے۔
بلوچستان ءَ ھزارانی کچ ءَ راشد بلوچ ھست اِنت کہ آیانی گسانی تہ ءَ اکس ایر اَنت، بلے جند اِش ساڑی نہ اَنت۔ ماسانی چم ارسیگ اَنت، گھارانی چیھانٹ بے تواری ءِ تہ ءَ گار اَنت، پِسانی اوست مرتگ اَنت۔

پھازداری کنگ ریاست ءِ سر ءَ پرز اِنت، وھدے کہ آ وت زوراکی کنت گڑا انساپ ءِ درسیں در بند بنت۔ پاکستان ءِ آئین شھریانی بنکی ھکانی مانزمانی ءَ دنت، بلے بلوچستان ءَ اے مانزمانی تھنا کاگدانی سر ءَ گندگ بنت۔ راشد بلوچ ءِ وڑیں ورنایانی زوریں بیگواھی، بلوچ ورنایانی بے ستکی، کینگ ءُ گستائی ءَ گیشتر کمک کنت۔ اے زوریں بیگواھی تھنا جانی نہ بلکیں اے سرجمیں پدریچ ءَ سیاسی، سسائی مالی ھساب ءَ تباہ کنگ ءَ اِنت۔

جست تھنا راشد بلوچ ءِ آجوئی ءِ نہ اِنت، بلکیں پہ اے درسیں بیگواھیں مردمانی آجوئی ءَ توار چست کنگ اِنت کہ آ چہ سالاں وتی پجار ءُ ھستمان ءَ زبھر اَنت۔ اے جست چہ ریاست ءَ اِنت کہ چے زاناں بلوچ ورنا تھنا پمشکا بیگواہ کنگ بوگ ءَ اَنت کہ آ جست کن اَنت؟ بگیری دار اَنت؟ یا آیاں بلوچ بوگ ءَ سزا دیگ بوگ ءَ اِنت؟

اگاں راشد بلوچ میار بار اِنت گڑا آمیدگس ءَ پیش کنگ بہ بیت، اگاں بے میار اِنت گڑا یل کنگ بہ بیت۔ بلے اگاں راشد بلوچ تھنا پہ بلوچ بوگ ءِ میار ءَ بیگواہ اِنت گڑا سرکار ءِ پیشانی ءَ یک انچیں پولنگے کہ آ کدی ھم ساپ نہ بیت۔