اُستادیں سبا نمیران اِنت

نبشتہ کار: کوھی بلوچ

وھدے کہ اُستادانی سالروچ برجم دارَگ بیت، گُڑا بلوچ دوست، راجدوست، زُبان دوست ءُ پہ آجوئی ءَ توار چست کنوکیں اُستاد سبا دشتیاری مُدام یات کنگ بیت۔ آئی ءَ را بلوچ مُدام گوں گوھریں دانکاں یات کنت، آئی ءِ ھمے جُھد ءِ بَرورد اِنت کہ مرچی منی ڈولیں نابُودے چَندے لبز کمات کُت کنت یا چَندے لبر نبشتہ کُت کنت۔

من واجہ، اُستاد، رَھشون، زَمین دوست، راجدوست ءُ زُبان دوستیں سبا نہ دیستَگ، بلے مرچی آئی ءِ جُھد ءَ شریں رَنگے ءَ سرپد آں۔ آئی ءِ اے کُرتگیں جُھد ءُ بُر اِتگیں پنداں منی راج ءِ چم پچ کُتگاں ءُ پہ آجوئی ءَ، پہ زُبان ءَ، پہ زَمین ءَ، ءُ پہ گُلامی ءَ رھادگ اِنت۔ اے واجہ سبا دشتیاری ءِ جُھد اِنت کہ منی راج ءَ وتی بزگی ءُ گلامی مار اِتگ۔

اگاں سبا ءَ را تُپنگ بڈ ءَ نہ بوتگ ءُ جنگ ءِ نہ کُتگ، بلے آئی وتی زُبان مُدام وتی بزگیں راج ءِ دیم ءَ پچ لگوشتگ کہ تو گُلام کنگ بوتگ ئے، تئی زَمین اَچ ترا چِہ پُلگ بوتگ، ترا جنگ کنگی ءُ وتی زَمین چہ زوراک ءَ پچگِرگی اِنت، تئی زُبان ءَ زوراک گار کنگ ءَ انت ترا پہ زُبان ءَ جنگ کنگی اِنت، اگاں تو مرچی جنگ وَتیگ نہ کُت گُڑا تئی آیوکیں پدریچ گوں ھمے گُلامی ءَ بندوک بیت۔

مرچی اگاں ھزار سبا دشتیاری گِندگ بیت گُڑا اے ھما سبا بوتگ کہ پہ وتی راج ءِ ننگ ءِ رکینگ ءَ، زُبان ءِ رکینگ ءَ، زَمین ءِ رکینگ ءَ، راجی پَجّار ءِ رکینگ ءَ، ءُ وتی راج ءِ آجو کنگ ءَ جُھد کُتگ ءُ وتی زمہ واری ءِ دومی ءِ کوپگاں داتگ کہ نوں اے جُھد ءِ دیم ءَ برگ تئی کار ءُ زمہ واری انت۔ مرچی اگاں واجہ سبا دشتیاری ءِ نام ءَ کَسے کہ گیپت گُڑا اے آئی جُھد ءُ جپاکشی بوتگ انت۔ اے آئی ءِ راجی زمہ واری ءُ راجی پَجّار ءِ رکینگ بوتگ کہ آئی نہ ایوک ءَ بلوچ راج پہ پھر ءُ شان نازینت۔

مرچی آئی اے جُھد ءَ منی سرڈگار ءَ رنگ آؤرتگ، آئی ءِ اے جُھد ءَ منی زُبان گار بوگ ءَ نیشتگ، آئی ءِ اے جُھد ءَ منی راج پہ جیڑگ ءَ لاچار کُتگ کہ ترا چے کنگی اِنت، آئی ء اے جُھد ءَ مرچی منی راج ءِ نودَربَر پہ پٹ ءُ لوٹ ءَ یا پہ چیزّے ءِ شوھازگ ءَ لاچار کُتگ انت۔ گُڑا بلوچ راج اے ڈولیں رَھشون ءَ پہ مُدامی گیر کار اِیت ءُ آئی ءَ مُدام گوں شھدیں دانکاں نازین اِیت۔

‎من مہ باں بِلّے واب زندگ بنت

‎زند ءَ جوریں جواب زندگ بنت

‎مھر ءِ دُرستیں ھساب زندگ بنت