نبشتہ کار: بابُل لتیپ
پہ بلوچ ءَ آئی زمین دوزھے ، ءُ اے دوزہ ءِ آس ءَ ھپتاد سال ءَ گیش بلوچ سُچان ءُ پیداک اِنت۔ اگاں مرچی بلوچ وتی جند ءِ دوار ءَ چمداریں زندمانے ءِ واھُند مہ بوتیں گوں اے ھوناکیں جاوراں کدی دُچار نہ کپتگ اَت ، بلکیں آجوئی ءِ کلّگ ءَ پہ مدیمی شادہ ءُ شاتکام بوتگ اَت۔
بلے!
چیردستی ءِ تند بستگیں زندمان ءَ مانگیشّ اِتگیں بلوچ وتی جند ءِ ڈگار ءَ درآمدیں زندے گْوازینگ ءَ اَت ، پمیشکا مارا چر اے تند بستگیں زندمان ءَ درکپگ ءِ ھاتِر ءَ راجی آجوئی جُنز ءِ بھر ءُ وتی ونڈ دَیگی اِنت داں آیوکیں پدریچ ءِ گْرانیں بار سُبکّ ءُ ارزان بہ بیت۔
اے اکس کہ مرچی رسانکدر ءِ جلواہ بوَگ ءَ اَنت ، اے وتی تھانگ ءَ درد ءُ تورِشتانی ویرانیں دوارے کہ ھزار رند ءُ پد ، کسّہ ءُ داستان ، جیڑہ ءُ جنجال ، تْرونگلیں ارس ءُ ھوادگیں بچکند ، دِگہ ھزاراں موتکی لیلو ءُ نازینکانی سھرائیں دْروشم، بلے ھمُک ءِ نِگاہ ءَ نئیت۔۔۔۔۔۔۔
وھدے بلوچ ءِ ھر نِگاہ اے اکسانی پجّارگ ءَ سوبین بوت ، گُڑا اے تند بستگیں زندمان چر اے ویرانیں لد ءَ در کپ اِیت ءُ ھزّام ءِ مِسکیں آتراپ ءَ بُندر کنت۔
بیا!
اے تند بستگیں زندمان ءَ گوں آجوئی ءِ رنگاں رجیں ءُ وتی آیوکیں پدریچ ءَ گورگیں بامے شکسا اِیں ، اگاں ناں چیردستی مئے اے زندمان ءَ گیش تند آماچ کنت ءُ اے ڈیھ ءِ کہ ما وت ءَ بُنِکّی وارِس ءُ واھُند گْوش اِیں درآمد ھاکمی کنت۔
پمیشکا مارا پہ وتی راجی باندات ءِ سمبھینگ ءَ راجی آجوئی ءِ جُنز مُھکم کنگی اِنت دانکہ باندا پہ نام پشت مہ کپ اِیں کہ اے دمگ ءَ بلوچ نامیں راجے بوتگ ، بلکیں ما وتی ڈگار ءِ وتواجہ ءُ واھُند بہ بہ اِیں۔
اے درگت ءَ منی راج ءِ ورناھانی زمہ واری گیش ودّ اَنت کہ آ راج ءِ اُمیت ءُ رُوژنائیں چمّ زانگ بہ اَنت ، اگاں راج ءِ ورنا گوں وتی ادارُکی زندمان ءَ گُلائیش ءُ چہ راجی زندمان ءِ پھریزگ ءَ بے سما پہ دگہ جھانے ءِ پولگ ءَ گُمسار بوت اَنت ، گُڑا ابید جند ءِ ریپینگ ءَ آیاناں دگہ ھِچّ دز نہ کپ اِیت۔۔۔۔۔۔۔۔۔۔
گھ ھمیش اِنت کہ منی راج ءِ ھر ورنا مرچی سما بہ کنت ءُ چو ھما تنگوئیں ورناھانی داب ءَ دیمونی ءِ دِیدانک ءَ مُھکم ءُ وتی ڈُبّہ ءِ پیلو کنگ ءَ ساجو بہ بیت ، گُڑا جزماں منزل مارا پہ نازے وش آتک کنت ءُ منی راج زُوت آجوئی ءِ مُراداں بیت۔
چی ءَ کہ آجوئی کُجام راجاں گِپتگ آیانی گْوستانک گوں دیمونیاں نبیسّگ ءُ پہ ما درونتے ، اگاں ما وتی گْوستانک ءَ پہ آیوکیں پدریچ ءُ ایدگہ راجاں درونت ءُ پنتے ءِ دْروشم ءَ سھرا ءُ مُجّتی کنگ لوٹ اِیں گُڑا مارا وتی رپتگیں سرانی دگ یلہ کنگی نہ اِنت ، پرچا کہ اے دگ مئے راجی باندات ءِ مانزمان ءُ وشھالیں زندمان اِنت۔
پہ اِیمنیں زندمان ءِ رجگ ءُ گوناپ دَیگ ءَ اے اکسانی پجّارگ ءَ ھوار مارا وتی دیمونی داتگیں سرانی دِیدانک ساٹگی اِنت ، چی ءَ کہ بلوچی ءَ گْوش اَنت سرے کہ ساٹ ئے سد سال ءِ اُمر بیت ، اگاں ناں یک روچے ءِ اُمر نہ بیت۔
بلے!
مارا راج ءُ راجی باندات ساٹگی اِنت ، اگاں چونیں دیمونی یے دَیگ بہ کپ اِیت۔۔۔۔۔۔۔۔
