آشوب اِنت وتن مروچی

نبشتہ کار:ماھل بلوچ

یک روچے من تنھائی ءَ نندوک اَت آن ءُ ھمے جیڑگ ءُ سسا کنگ ءَ اِت آں، کہ مئے راج  مئے کوم وتی وتَن ءِ دوستی ءَ انچُو دیم ءَ  روگ ءَ اِنت کہ گونڈ گونڈیں چُک ھم  لوگ ءَ چہ در گپگ ءَ اَنت، من انچیں مردم دیستگ کہ ھچ سرپد نہ اَنت، کہ بلوچستان ءُ بلوچستان ءِ مول ءُ مُراد چی اِنت، جنگ چی یے، بلے آزاتی ءِ اوگام ءَ جنان ءُ ڈن ءَ درکپان اَنت، اگاں مرچی اے چُک چُک ءِ دپ ءَ اے مزاھمت ءِ اوگام ءَ جنان اَنت ءُ وت ءَ سر کنگ ءَ اَنت، مروچی بزاں اے جُھد ءِ بندات چَہ لمّہ بیتگ لّمہ ءَ ھم وتی سر کُربان کُت پہ ڈیھ ءَ، ھمے دور ءَ کہ لُمّہ شھید کنگ بوتگ اَت اے وھد ءَ ھم نودربر کسانیں چُک ھم سک نا زانت اِت اَنت کہ گھگیری چی یے،؟  لمّہ ءَ ھمے یکین بیتگ کہ روچے نہ روچے ءَ منی ءُ  منی سنگت اے جھد ءَ دیم بر اَنت ءُ منی کوم ءُ  راج وت ءَ یک زانتے دنت ءُ یکجاہ بیت،، دریگتیں کہ لّمہ مرچی مئے تھ ءَ گون بوتیں، بلے وت شُت لمّہ ۔

بلے مئے دلانی تہ ءَ اِنت ھرچ لوگ ءَ مرچی لُمّہ پیداک بوھان اِنت، اے سوگات مارا ﷲ ءَ داتگ ما چو لّمہ ءِ رنگ ءَ بہ ایں ، گودی ماھرنگ ھم  مرچی لمّہ ءِ دروشم ءَ جنت ھمے ، ھمت، ھما گھگیری ، ھما درد، ھما پکر ،ھما سسا، بلے مرچی ما اگاں بچاریں لوگ لوگ ءَ لُمّہ کریمہ ءُ مھرنگ ءُ سمی  ءُ سبیہ در کپتگ اَنت مرچی سجھیں بلوچستان لُمّہ ءُ مھرنگ جوڑ بیتگ، مرچی سجھیں  بلوچستان  لوگ ءَ چہ ڈن در کپتگ مھرنگ ءِ یک توارے ءَ، مئے برات ءُ گھار وتی جاناں دیگ ءَ اَنت، نی اے توار ءَ ریاست چتور بند کُت کنت، نو راج یکمُشت بوتگ ءُ نی کدی ھم ھاموش نہ بیت۔۔۔

مرچی ما اگاں بچار اِیں مئے سورانی سر ءَ مئے سالونک ءُ بانورانی بدل ءَ مئے مھرنگ ءَ  نازین اَنت مئے ھما برات ءَ  نازینگ ءَ اَنت، ھما کہ پہ وتَن ءَ  شھید بیتگ اَنت، مئے سورانی سر ءَ وتَن نازینگ بیت، مئے لمّہ نازینگ بیت، ھمے وھد ءَ مئے لمّہ گودی ءُ دگہ ھما بچ نازینگ بنت کہ پہ وتَن ءَ شھید وتی سر اِش ندر کُرتگ اَنت، گڑا ھمد ءَ نندوکیں سجھیں بلوچ مرچی کہ مُچ بوتگ ءُ یکجاہ اِنت ، گُڑا اے راج ءِ سرجمیں مردم مرچی اے زوراکیں ریاست ءِ سر ءَ نپرت جوڑ بوتگ ، یک آشوبے ودی بوتگ ، یک پگرے ھوار اِنت۔۔

اے نپرت ریاست ءَ وت بندات کُتگ نی اے نپرت چک چکانی دل ءَ اِنت ، دانکہ بلوچستان ءِ آجوئی ءَ۔۔۔۔

اے نپرت بلوچانی دل ءَ ھما وھد ءَ ھلاس بیت کہ وھدے تو مئے ڈیھ ءَ یل بہ کن ئے ءُ برو ئے۔

اے یزیدی لشکر ءِ روچ ھم ھلاس بوگ ءَ اَنت، انشاءَاللہ بلوچستان مئے گلزمین اِنت مئے مات اِنت مئے وتی ڈگار اِنت مارا الم ءَ  رس اِیت ءُ ما باج بریں نی روچ نزیک اَتکگ دیر نہ بیت ڈیھ مئے آجُو بیت بلوچستان بانور بیت، سرمچار چہ کوھاں کاینت شاتکامی ءِ تیراں جن اَنت ءُ ھرگور ءَ بلوچستان ءِ بیرک مِکّ بیت۔۔۔۔