ما زندگی ءِ لیب ءِ رنگ گوں ابرم ءَ بدل کُتہ
کہ باج بُرتہ کندگے ءُ رھنیں درد موکتہ
وھد گوں وتی تْرندیں گاماں جُنزان اَت، 2022 ءِ جون ءَ من چہ آئی ءَ جتا بوتاں کہ من شُرّ ءِ مھروانیں زمین، باگی کوہ ءِ مستریں ٹُلّ، سینکُرّی ءِ گیت ءِ دْرچک، مُھبلی ءِ ھَت، کِشاری ءِ جُگّ، موسکائی ءِ گْون، سُمالو ءَ شھید اھسان ءُ شھداد ءِ مانش، کورکی ءِ کبگانی تَوار، سِکی ءِ سیسوانی رِٹ، تھتی ءِ کرگوشکانی چراگجاہ، گوربْرات ءِ کِشت ءُ کِشار ءُ کے ڈی جان ءِ کندگ ءُ لیٹ ورگ ءُ ٹاک دیگ پُشت ءَ اِشت اَنت ءُ پہ دِگہ دَیارے درکپت آں۔
زندگی ءِ سرا ھِچ باور نیست کہ کجام وھد ءَ رنگ بدل بکنت انچو کہ میرل ءُ بارگ شُت اَنت پَدا ما پہ چمّے نہ دیست اَنت۔ ھمے وڑا من ھچ نزانت کہ دوبر باریں من گوں کئے ءَ یکجا باں کئے اے زِند ءِ سپر ءَ دْروھیت ءُ رَوت۔
منی سپر تمام نہ بوتگ اَت ھال رس اِت کہ شُرّ ءَ پاکستان ءِ لشکر جھلی ءُ بُرزی لشکر کشّی کنگ ءَ اِنت۔
بلوچ راج ءِ دْراھیں سرمچار من ءَ چہ ساہ ءَ گیشتر دوست اَنت بلے ھما سنگت کہ گوں آیاں مردُم ءَ یکجا درد بھر کُرتگ گیشتر دوست بنت پہ آیاں مردُم گیشتر پریشان بیت۔
اے لشکر کشّی ءَ دو سنگت شھید بوتگ اَت، بازیں سنگتے ءِ ھال نیست اَت گُڑا من پہ کے ڈی سکّ پریشان بوتاں،پرچا کہ سنگتے ءَ ھال دات کہ کے ڈی گوں ھمے شھیدیں سنگتاں یکجا بوتگ۔
دو روچ ءَ پَد کے ڈی ءَ ھال کُرت گُڑا من سکّ چیڑینت کہ شھادت تئی بھت ءُ نسیب ءَ نہ اِنت۔ آئی ءَ تھنا کندِت ءُ پسّو دات “پاکستان ءِ پِسّ ءَ را تاگت نیست کہ من ءَ بہ جنت۔ داں کہ من وَت وتی مرگ ءِ پیسلہ نہ زُرتگ۔”
پَدا اناگہ ءَ ھال آھت کہ کے ڈی وتی دنتان الاج کُرتگ اَنت۔
گُڑا سنگتے ءَ آئی ءِ اَکسے دیم دات کہ دنتان ئِے بِل بلگ ءَ اَنت۔من آئی ءِ لمبر گِپت ءُ ھال ھوال کُرت “ھاں اڈے تو چُھٹّی ءَ شُتگ ئے ھال اِت نہ کُرتہ؟”
آئی ءَ پسّو ترّینت “ھَو دنتاناں بے وار کُرتگ اَت پہ اِلاج ءَ آھتگاں واتر رواں۔”
من گُشت “تو دنتان نوک کُتگ اَنت زاناں ھچ وڑا ترا شھید بُوّگ ءِ ارادہ نیست۔”
آئی ءَ تواربندے دیم دات سکّ کندگ ءَ اَت گشگ ءَ اَت تو بلاھیں شومے ئے پہ منی شھیدی ءَ دُوا کن ئے۔
پَدا ھمے نْیام ءِ تھا بچار برے لائن ءَ اِنت برے دو دو ماہ ءَ نیٹورک ءَ نہ اِنت۔اگاں نیٹورک ءَ مہ بوتیں گُڑا من سکّ بے وار بوتاں نزانت گوں کئے ھال بہ کناں گوں شوکی ءُ مزاکے بہ کناں۔
یکبرے من سوج کُرت “یار تو پرچا نیٹورک ءَ نہ ئے؟”
گُڑا آئی ءَ پسّو دات “یار منا سِمّ نیست برے برے سنگتے ءِ کِرّا وائی پائی ءَ کنیکٹ کناں ھال کناں۔”
من گُشت نزاناں من کوہ ءَ را یلا دات یا کوہ ءِ سنگتاں منارا یلا داتگ۔ کسّے ھال ھوال ھم نہ کنت۔
آئی ءَ کندِت ءُ گُشت “عمل انسان ءَ را شرپ دار ءُ اِزّت دار کنت مزن کَنت۔من تو نوں بے عمل جوڑ بوتاں، مارا نوں کسّے پیماز ءِ نرخ ءَ سوج نہ کنت”۔
ھمے نْیام ءِ تھا مزنیں وھدے گْوست آ ھمے وڑا اَت برے نیٹورک ءَ اَت برے گار اَت۔گُڑا من مُدام سوج کُرت چون اِنت شُرّ ءِ ارادہ نہ کُرتگ ئے۔ گُڑا آئی ءِ پسّو ھمیش اَت کمّو آرام کناں نوں جنگ ورنایانی دست ءَ اِنت اِلاج بروبر بہ بنت گُڑا تسلّی ءِ سرا رواں۔
من ھمے سادگ چو نزانت دنتانانی اِلاج ءَ اینکہ وھد نہ لگّ ایت۔
آئی ءِ گُڈّی ھال ھوال گومن نومبر 2023 ءَ بوت۔ھمے گُشت ئِے کہ من کوہ ءَ روگ ءِ اِرادہ کُرتہ بس لھتیں روچ ءِ تھا انشاءَ اللہ پروگرام اِنت۔
روان اِنت
