دروت کینگی جان!!
مرچی ھبدہ جون ءِ شپ بزاں کہ ٹوھیں ائید ءِ شپ اِنت ءُ من پہ ترا اے نمدی نبشتگ کہ بگندئے منی نمدی ترا سر نہ بیت ءُ من ترا دروت ءُ دراہ باتی ھم کرت نہ کناں، چی ءَ کہ تو چہ من ءَ باز دُور ءُ گِستا وتی ابدی ھنکین ءَ شُتگ ءِ مرچی ائید شپ ءَ تو بے کساس گیر پیداک ئے بلے من ءُ تو انچو جتائیں کہ ڈیک ھم وارت نہ کنیں۔
کینگی جان!!
اے ائید ءَ من ءُ تو یکجاہ نہ اِنت، ائید ءِ مرادباتی ءُ ھک پھلی ھم کرت نہ کنیں، بلے من ترا ھمے گوشگ لوٹاں کہ چہ تو پد اے ائید سک باز ابیتک اَنت، ھما کہ ائید وشی بوتگ اَنت، پھک گوں شمئے روگ ءَ ھوار ھلاس بوتگ اَنت،ائید ءِ روچ گوں شمئے رنگیں مھروانیں ھمبلاں یکجاہ گوازینگ باز پُر لزت بیت۔
دومی گپ اِش اِنت کہ گلامیں راج ءَ پہ چون ءَ منی ھیال ءَ ائید نہ بیت، چیا کہ بنی آدم ءِ زند رسترانی دست ءَ اِنت، آ ھمک روچ زندمان ءَ گوں ھونیگیں جاوراں دوچار کنگ ءَ اَنت، ورنائیں بچاں بیگواہ کنگ ءُ تھاریں کوٹیانی باھوٹ کنگ ءَ اَنت، آیانی ژانگولیں جوناں چگل دیگ اَنت، آ راج ءِ ائید ھم گوں اَرس ءُ ھوناں گوزیت۔
کینگی جان!!
چہ رستریں پاکستانی لشکر ءِ زوراکیاں ھمک گس پُرسیگ اِنت، ھر روچ ورنائیں بچ، مات ءُ گھار زوراکیانی دیمپان اَنت، آیانی ائید دگانی سر ءَ گْوز اَنت ءُ چم اِش پُر اَرس اَنت، وتی تلاھیں بچانی اکس دست ءَ اَنت ءُ دگانی سر ءَ کپتگ اَنت۔
دومی نیمگ ءَ شمئے وڑیں زمین دوستانی یات ءُ گیراں چہ اے ائید ابیتک ابیتک اَنت چی ءَ کہ ائید یک وشّی ءِ روچے اے وشیں روچ ءَ کُلّیں جھان ءِ مردم وتی کھول ءُ دوستیں سنگتانی ھواری ءَ گوازین اَنت ءُ وشی کن اَنت۔ بلے چہ مھروانیں ھمبلانی روگ ءَ ائید ءِ وشّی ھم شُتگ اَنت۔
کینگی جان!!
مرچی ائید ءِ شپ ءَ تو بے کساس گیر پیداک ئے، گوستگیں سال ءِ ائید ءَ ما ءُ تو ھور ءُ یکجاہ اِتیں، ائید سک وش اَت، بلے اے ائید بے ترا ابیتک اِنت۔ ائید ءِ سھب ءَ مھلہ درسیں مردم وتی سنگت ءُ دوست ءُ آزیزاں ائید مبارکی کن اَنت ھک پھلی کن اَنت، من بلے ترا ائید مبارکی دات کرت نہ کناں بس ھمے گُوشاں۔ باگیں بھشت ءَ بات ئے، وتی بابا ءُ آدگہ کُلّیں سنگتاں سلام کن۔
