پہ بلوچستان ءِ آجوئی ءَ برجاھیں جنگ ءَ نمیران بوتگیں راجی بامردانی لڑ سکا دْراجکش اِنت۔ سال ءِ ماھانی ھمک روچ ءَ شھیدانی سالروچ ھست ، بلے لھتیں روچ یک ءُ دو یا دہ ءَ گیش شھیدانی سالروچ ھم زانگ بیت۔ چوشیں روچ باز کم اِنت کہ آ رمس گوں بلوچ راجی شھیدانی سالروچ ءَ ھوار نہ اِنت۔
بلوچستان ءِ تہ ءَ چوشیں کھول ھست اِنت کہ یکیں کھول ءِ سے ءُ چار یا گیش مردم آجوئی جنگ ءِ میان ءَ شھید بوتگ اَنت۔ یا دو سے برات شھید بوتگ اَنت یا پت گوں وتی دو سے پل گونگیں بچاں پہ ماتیں سرڈگار ءِ موکک ءَ نمیران بوتگ۔
ھمے وڑ ءَ مروچیگیں روچ 19 مئی بلوچ راجی شھیدانی روچے زانگ بیت۔ اے روچ ءَ بزاں 19 مئی 2015 ءَ مشکے ءِ کوھی دمگ اسپیت ءَ زورگریں پاکستانی لشکر ءِ لشکرکشی ءِ میان ءَ بی ایس او آزاد ءِ باسک پل گونگیں مھراج جان شھید کنگ بیت۔
شھید مھراج جان 3 مارچ 1993 ءَ مشکے ءِ میتگ گجر ءَ شھید کماندار واجہ رھمت پنام ء ھاکم ءِ گس ءَ ودی بوتگ۔ شھید مھراج جان دہ تبک ءِ نودربر ءُ بی ایس او آزاد ءِ ایماندار ءُ جپاکشیں باسکے بیت۔
شھید مھراج جان ءِ کماش شھید واجہ رھمت پنام ء ھاکم جان 21 جنوری 2015 ءَ زورگریں پاکستانی لشکر ءِ سر ءَ ارشے ءِ میان ءَ شھید بوتگ ، بلے آئی سکین داتگیں پسگاں وتی آجوئی جھد برجاہ داشتگ۔
گْوش اَنت یک آشوبی جھدکارے درساں پیش وتی کھول ءِ تہ ءَ آشوبی ودی بہ کنت۔ بلکل ھمے وڑ ءَ شھید واجہ رھمت پنام ء ھاکم جان ءِ پہ آجوئی جنز ءَ ودی کرتگیں راجدوستیں جھدکار سک باز اَنت ، بلے آئی ءِ دو ورنائیں بچ مھراج جان ءُ پرھاد جان ھم نمیرانی ءِ لڑ ءَ ھوار اَنت۔
مھراج جان ءِ نمیرانی ءَ پد آئی مستریں برات پرھاد جان کہ آ بی ایس او آزاد مشکے ھنکین ءِ کمک سرکماش اَت ماھے ءَ پد جون 2015 ءَ مشکے ءِ میتگ میھی ءَ گوں شھید کماندار سلیمان پنام ء شھیک جان ، آئی ءِ برات زاکر پنام ء سیٹ ، رمزان پنام ء بالاچ ، ماسٹر سپرھان ، گاجی ھان ، الم ھان ، ھدا نزر ، انیس ، پیسل ، رپیک ءُ زھیر ءَ ھوار شھید بیت۔
گپ ایش اِنت کہ پل گونگیں مھراج جان چہ وتی پت ءِ شھیدی ءَ پد ھم آئی ارادہ گیش مھکم بیت ءُ وتی راجی آجوئی جھد ءَ برجاہ دار ایت ءُ دانکہ وت ءَ پہ مدامی نمیران کنت۔ مرچی ھما پل گونگیں شھید مھراج جان ءِ داتگیں دیمونی ءُ لیکہ مئے راھشونی ءَ کنگ ءُ مارا توکل ءُ ھاٹیگ بکشگ ءَ اِنت۔
مدام ءَ کپتگ کوھانی نیام ءَ ھما بلوچے
وتن پہ جُھد ءَ اِنت سُھب ءُ شام ءَ ھما بلوچے
بہ بیت دودا بہ بیت بالاچ بہ بیت ایں ھمل
بہ جنت ایں بدواہ ءَ گام پہ گام ءَ ھما بلوچے
مہ داریت چماں پہ چرپیں چانیگ ءَ واجکار ءِ
بہ سندیت ایردستی ءِ لگام ءَ ھما بلوچے
بہ کنت بڈ ءَ براس ءِ لاش ءَ مہ کنزی پُشت ءَ
بہ داریت جنگ ءَ مہ روت سلام ءَ ھما بلوچے
پہ شئر ءُ گال ءَ نباں اَدا ھکّ زمین ءِ سربازؔ
ھما گوں بیلاں بروت دو گام ءَ ھما بلوچے
