مبارک کازی ءِ شائری ءِ دو بھر نبشتہ کار: داد بلوچ

جھان ءِ تہ ءَ انچیں راجدوست گْوستگ کہ آھاں وتی سرجمیں زند وتی راجی دیمروئی ءِ واستا نْدر کتگ۔ اے راجدوستاں وتی راجی ھستمان ، راجی زبان ، راجی گْوستانک ، راجی جز ءِ سر ءَ سکا کار کتگ۔ اے راجدوستاں جھان یک راجدپتر ءُ اھدے ءِ وڑ ءَ یات کنت۔ اے راجدوستیں سپاھی ، کماندر ، کلمکار ، زباندوست ءُ شائر ءِ دْروشم ءَ بوتگ اَنت۔

مروچی من یک انچیں راجدوست ءُ زباندوستے ءِ بابت ءَ نبشتہ کن آں کہ آئی ءَ وتی سرجمیں زند راجی زبان ءِ دیمروئی ءِ واستا گْوازینتگ۔ اے راجدوست بلوچی زبان ءِ مزن نامیں شائر واجہ مبارک کازی اِنت کہ آئی بابت ءَ ھرچی نبشتہ بہ کن کم اِنت۔ من وتی نبشتانک ءِ بندات ءَ گوں مبارک کازی ءِ زند ءِ ھال ءُ اھوال ءَ کن آں۔

مبارک کازی 24 دسمبر 1956 ءَ بلوچستان ءِ تیاب دپی شھر پسنی ءَ ودی بوتگ۔ آئی ءَ وتی بنداتی وانگ ءُ زانگ وتی ھند ءَ سرجم کتگ۔ 1986 ءَ بلوچستان یونیورسٹی ءَ ماسٹر سرجم کت ءُ پد ءَ شائری ءِ پڑ ءَ وتی پاد ایر کرت اَنت۔ آئی ءِ اولی کتاب ” زرنوشت ” 1990 ءَ چاپ ءُ شنگ بوتگ ، ءُ آئی کل 10 کتاب چاپ ءُ شنگ بوتگ۔ آئی ءِ یک بچکیں زھگے بوتگ (کمبر کازی) کہ بلوچ راجی آجوئی ءِ جھدکارانی کاروان ءِ ھمراہ ءُ داں شھید بوتگ۔

مبارک کازی 16 ستمبر 2023 ءَ تربت ءَ بیران بوتگ ءُ آئی گڈی وابجاہ پسنی ءَ اِنت۔ آئی جنازہ ءَ بلوچ راج ءِ یک بلائیں مچّی یے ھوار بوتگ۔ آئی ءِ بیرانی ءِ داں سئے چار ماہ ءَ بلوچ نودربر ءُ سیاسی جھدکاراں آئی سر ءَ مراگش برجم داشتگ ءُ ستک شانی نْدر کتگ۔ بلوچ راج ءِ اے جھد ھمے ھبر ءَ سھرا کنت کہ بلوچ راج وتی راجی جھدکاراں داں زندگیں یات کنت ءُ آیانی کرداں راجدپتر ءِ توکا نبشتہ کنت ءُ آیوکیں پدریچ ءَ وانین اِیت۔

چوناھیا مبارک ءِ شائری دو بھر ءَ اِنت۔ اولی بھر بلوچی زبان ءِ دیمروئی ، دومی بھر بلوچ راج ءِ دیمروئی شائری ءِ پڑ ءَ۔ من وتی نبشتانک ءِ تہ ءَ مبارک ءِ دومی بھر ءِ سر ءَ چمشانکے دئے آں۔

بلوچ راج ءِ دیمروئی شائری ءِ پڑ ءَ:
دومی بھر ءَ مبارک کازی ءِ شائری بلوچ راج ءِ دیمروئی ءِ سرا اِنت ، آئی ءَ وتی شائری ءِ پڑ ءَ بلوچ راج ءِ سیاسی ءُ گھگیری جھدکار دیم ءَ برتگ اَنت۔ آ ھر وڑیں زلم ءُ زوراکی ءِ بگیر بوتگ ءُ آئی ءَ بدکاریانی بگیر ءَ شائری ءِ دْروشم ءَ جنگ کتگ۔

آئی ءَ بلوچ راج ءِ گْوستانک ، زبان ، دود ءُ ربیدگ ، زید ءُ کھچر نازینتگ اَنت۔ آئی ءَ بلوج راج ءِ سر ءَ بوتگیں زلم ءُ زوراکی ءُ پدکنزی ءِ سر ءَ ھم نبشتہ کتگ۔ مبارک کازی ءِ ھر شئیر ءُ شائری ءِ تہ ءَ بس بلوچ ءُ بلوچستان گندگ ءَ کئیت۔ ما اے گپ ءَ ھچبر رد نہ بہ اِیں کہ مبارک کازی ءِ شائری بس بلوچ ءُ بلوچستان ءِ سر ءَ بوتگ۔ آئی ءَ بلوچ ءُ بلوچستان چو ساہ ءِ وڑ ءَ دوست بوتگ۔ آئی ءَ بلوچستان ءِ ھر ڈوک ءُ ڈل نازینتگ اَنت۔ مبارک کازی ءَ بلوچ راج ءِ دیمروئی ءِ واستا چاگرد ءِ ھر پڑ ءَ شائری کتگ ءُ بلوچ راج ءِ توار بوتگ۔ آئی ءَ بلوچ راج ءِ وانگ ءُ زانگ ءِ سر ءَ شائری کتگ ءُ بلوچ نودربراناں وانگ ءُ زانگ ءِ سکین داتگ۔ آئی ءَ بلوچ نودربرانی سر ءَ بازیں شئیر نبشتہ کتگ ءُ گْوشتگ ، پہ درور

آزمان ءَ سر اَنت آ دگہ راج گوں وانگ ءُ زانگ ءَ
پہ بلوچاں مدام گژن ءُ بیماری اِنت چے نبشتہ کناں

دومی شئیر

پہ ھزابی ونت شھر ءِ مکتباں شانزدہ سبک
چاریں آتراپاں چکراں روزگارے درنئیت

سیمی شئیر

تئی پیریں مات مدام کڈک ءِ دپ ءَ نشتگ
نہ تو درا بہ ئے نہ تئی وانگانی ھالے کئیت

مبارک کازی ءِ اے شئیر بلوچ راج ءَ وانگ ءُ زانگ ءِ سکین ءَ دئے اَنت کہ بلوچ راج ءَ وانگ ءُ زانگ ءِ پڑ ءَ سکا دیم ءَ روگی اِنت ، پرچا کہ وانگ ءُ زانگ ءِ برورد ءَ راج دیم ءَ رو اَنت ءُ آزمان ءَ سر بہ اَنت۔

مبارک کازی بلوچ راجی آجوئی ءِ منوگر ءُ زورگریں پاکستان ءِ بگیر بوتگ۔ آئی ءَ مدام وتی شئیر ءُ گپانی تہ ءَ بلوچ راجی آجوئی ءِ جھدکار نازینتگ ءُ شائری کرتگ۔ آئی ءَ مدام پارلیمانی پارٹیانی بگیر ءَ گپ جتگ ءُ گْوشتگ کہ اے راجدوست نہ اَنت ، بلکیں اے اوٹ پنڈ اَنت۔ اے درگت ءَ مبارک کازی بلوچ سرمچارانی سر ءَ شئیرے نبشتہ کنت ءُ گْوش اِیت:

پہ ڈیھ ءِ ھاتر ءَ کہ یک سرمچارے شھید بیت
بھشتیانی سور ءِ شپ ءَ ملائکانی ائید بیت