گوادر ءَ پاکستانی چیریں ادارھانانی کارمنداں ورنا یے آوار جتگ ءُ بیگواہ کرتگ ءُ شال ءَ ھم ورنایے بیگواہ اِنت۔
اھوالکار ءِ رد ءَ چہ گوادر ءَ بیگواہ کنگ بوتگیں ورنا ءِ نام بالاچ ء اَبدروپ اِنت کہ گوادر پکیر کالونی ءِ جھمنند اِنت۔ بالاچ ءَ پاکستانی لشکر ءِ جوڑ کرتگیں چیریں ادارھانی کارمنداں دوشی دوازدہ ءَ ھما وھد ءَ آوار جتگ کہ آ چہ بازار ءَ دیم پہ گس ءَ روگ ءَ بوتگ۔
بنشون ءِ رد ءَ چہ شال ءَ بیگواھیں ورنا ءِ نام امران ء سوالی اِنت کہ کیچ ءِ ھند ھوشاپ تل ءِ جھمنند اِنت۔ امران سے جنوری ءَ بیگواہ بوتگ انگت ءَ آئی ھچ وڑیں ھال نیست۔
امران ءِ برات ءَ آئی بیگواھی ءِ کیس شال ءِ بروری دگ ءَ پولیس بنجل ءَ یاداشتگ کرتگ۔ آئی نمبر ٹریس کنگ بوتگ کہ آئی گڈی جاہ شال کینٹ ءِ نزیک ءَ پیش دارگ ءَ اِنت، ھمے گمان کنگ بوگ ءَ اِنت امران ءَ پاکستانی لشکر ءَ آوار جتگ ءُ بیگواہ کرتگ۔
