بلوچ وومن پورم ءِ سروک ڈاکٹر شلی ءَ ماں رسانکدر ءَ وتی شنگ کرتگیں درشانےءَ گوشتگ کہ بلوچستان انو ںسرجم ءَ دگانی سرا اِنت، بگندئے ھروچ مردم ءُ ھیش ٹیگ مٹ بہ بنت بلئے کِسّہ ھما اِنت، بلوچ ءِ ھمک گِس چہ نہ سگگوکیں درد ءُ اندوھاں سر ریچ اِنت،اے تورشتانی کِسّہ گوں لبزاں نہ بیت۔
آئی ءَ گوشتگ کہ بلوچستان یک انچیں دورے ءِ تہ ءَ گوزگ ءَ اِنت، کہ بازیں ماتاں آیانی زھگانی جون ھم دیگ نہ بنت ءُ آ بے کس گوشگءُ کنڈ کنگ بنت، آ سالانی سال ودار کن اَنت پہ وتی تنگوئیں بچاں بلئے انگت آ نہ زان اَنت کہ آیانی چُک ھست اَنت یا نا۔
ڈاکٹر شلی ءَ گوشتگ کہ اے زندان ھُشکیں تھاریں کوٹی نہ اَنت، اے تھاریں کوٹیانی تہ ءَ بلوچ ءِ زانتکار بندیگ اَنت، اے کوٹیانی تہ ءَ بلوچ ءِ لبزانک اَنت ، ھما سر زندانیگ اَنت کہ آیاں ایوک ءَ پہ وت نہ جیڑیتگ آیاں راج ءِ گرانیں بار کوپگاں زرتگ ءُ ریاستی آزارجاھانی تہ ءَ وڑ وڑیں آزار سگگ ءَ اَنت۔
آئی ءَ گوشتگ :چنگیز بلوچ کہ 11 جنوری 2014 ءَ گار ءُ بیگواہ کنگ بیت آ وھد ءَ آئی ءِ امر 17 سال بیت ءُ دہ تبک ءَ وانگ ءَ بیت، چہ گار ءُ بیگواھی ءَ تھنا یک کھولےسانمند نہ بیت بلکہ سرجمیں کھول سسائی ءُ مالی جنجالاں اوپار کنگ ءُنیم مُردگی زند گوازین اَنت۔
ڈاکٹر شلی ءَ گوشتگ کہ انوگیں وھد ءِ مستریں لوٹ مئے یکجاھی اِنت ،یکمُشتی اِنت ءُ ھم سنتی اِنت، اگاں ما زوراکیانی بگیری ءَ یکجاہ بہ بئیں گڑا مئے توار گیشتر مھکم بیت ءُ اے زوراکی مُدامی نہ مانیت۔
