گْوادر: نومان ء اسھاک ءِ زوربیگواھی ءِ بگیری ءَ آئی کھول ءَ دو روچ اِنت جی ٹی گیٹ ءِ دیم ءَ زھرشانی ءَ نشتگ۔
نومان ءِ گھار ءَ گْوشتگ کہ منی برات پاکستانی لشکر ءَ 27 نومبر 2024 ءَ گْوادر ءَ ڈوریہ تیاب دپ ءَ آوار جتگ ءُ بیگواہ کرتگ۔ مئے زھرشانی ءَ دو روچ اِنت کہ برجاہ اِنت۔ ما جی ٹی گیٹ ءِ دپ ءَ نشتگیں۔
آئی گوشتگ کہ پہ نومان ءِ آجو کنائینگ ءِ ھاتر ءَ ما پیسر ءَ گوں آمیدگس ءُ پاکستان ءِ چیریں ادارھاں لوٹ کُرتگ کہ اگاں منی برات ءِ سر ءَ چونیں بھتامے ھست آئی ءَ آمیدگس ءَ پیش بہ کن اِت بلے ایشانی گوشاں مورے نہ وارت۔
آئی گوشتگ داں کہ منی برات آجو کنگ نہ بوتگ ما وتی زھرشانی ءَ برجاہ داریں ءُ سی پیک دگ ءَ ھم بند کنیں بلے پیسر ءَ ما جی ٹی گیٹ ءَ زھرشانی کنگ ءِ پیسلہ کُرتگ۔
