آواران: بلوچ وومن پورم ءِ نیمگ ءَ شھید لمہ کریمہ ءِ یات ءَ مراگشانی درچ ءَ مرچی کولواہ ءِ میتگ مالار، کرک ءِ ڈل ءَ مراگشے برجم دارگ بیتگ۔ مراگش ءَ مالار ءِ کِر ءُ کشانی نزیکیں میتگانی مردماں بازیں کچے ءَ بھر زرتگ۔
چوش کہ بلوچ وومن پورم ءِنیمگ ءَ آواران دمگ ءَ شھید بانک کریمہ ءِ یات ءَ اے دومی مراگش بیتگ۔ بنداتی مراگش شھید کریمہ ءِ سالروچ ءِ درگت ءَ 21 دسمبر ءَآواران ءِ ھند تیرتیج ءَ برجم دارگ بیتگ اَت۔
اے بابت ءَ بلوچ وومن پورم ءِ سروک ڈاکٹر شلی ءَ گوشتگ کہ شھید لمہ کریمہ ءِ یات ءَ بلوچ وومن پورم ءِ نیمگ ءَ مراگشانی درچ برجاہ اَنت۔
ڈاکٹر شلی ءَ مرچی وتی شنگ کرتگیں تامربندے ءَ گوشتگ کہ باندا کولواہ ءِ میتگ بلور ءَ شھید کریمہ ءِ یات ءَ مراگشے برجم دارگ بیت۔
آئی ءَ گوں بلور ءِ کِر ءُ کشانی نزیکیں میتگانی مردمانی گون ءَ لوٹ کرتگ کہ بیا اَنت ءُ مراگش ءَ بھر بزور اَنت۔
