آواران: بلوچ وومن پورم ءِنیمگ ءَ تیرتیج ءَ شھید بانک کریمہ ءِ شھیدی ءِ چارمی سالروچ ءَمراگشے برجاہ دارگ بیتگ۔ مراگش ءَ بلوچ وومن پورم ءِ سروک ڈاکٹر شلی ءَ ھوارجتائیں بھرگاں سیادی داروکیں مردماں بازیں کچے ءَ بھر زرتگ۔
مردماں تران کنان ءَ شھید بانک کریمہ ءِ زند ءُ آئی جھدءُ جپاکشی ءِ سر ءَ وتی ھیال درشاں کرتگ اَنتءُ شھید بانک کریمہ ءَ ستک شانی ندر کرتگ۔
شھید بانک کریمہ بی ایس او آزاد ءِ بنداتی جنین اِنت کہ آ گل ءِ سرکماش بیتگ ءُ پہ بلوچستان ءِ آجوئی ءَ جھد کرتگ ءُ بلوچ جنینان ءَ پہ آجوئی جھد ءُ گھگیری ءَ سکین داتگ۔
مراگش ءَ مردماں تران کنان ءَ گوشتگ کہ شھید لمہ کریمہ ءِ جھد نہ تیوک ءَ پہ بلوچستان ءَ بلکیں پہ سرجمیں جھان ءِنزوریں راجاں مادنیں کشکے۔ آئی دیمونی مارا پہ وتی ھکاں جھد کنگ ءِ سکین ءَ دنت۔
آیاں گوشتگ کہ شھید کریمہ ءَ بلوچستان ءَ ابید 2016 ءَ وھدے کینڈا ءَ شتگ گڑا ھمودا ھم آئی وتی جھد برجم داشتگءُ 21 دسمبر 2020 ءَ شھید کنگ بیتگ۔
آیاں گوشتگ کہ شھید لمہ کریمہ ءِ پگر ءِ کاروان داں وتی گڈی منزل ءَ برجاہ بیت۔
