شال: بلوچ نیشنل موومنٹ ءِ پیشگیں کارگشاد ءُ بلوچ سروک رھیم بلوچ ایڈووکیٹ ءَ ماں چاگردی رسانکدر ایکس ءَ وتی یک درشانے ءَ گْوشتگ کہ بلوچ آجوئی لوٹوکیں سروک واھد بکش پنام واھد کمبر ءَ پنچ ماہ بیت کہ پاکستان ءِ چیریں ادارھاں آوار جتگ، انگت ءَ ھچ آمیدگس ءَ پیش کنگ نہ بیتگ۔
آئی ءَ گْوشتگ کہ پاکستانی لشکر،پولیس ءُ آدگہ لشکر زورگپتیں بلوچستان ءَ زور بیگواھی، زوراکی ءُ درکانودی مردماں پاھو دیگ ءُ آدگہ میارباریانی کارمرد کنگ پاکستانی ریاست ءِ نابودی ءَ پدر کنت۔ ابید کانود ءُ انساپ ءَ ریاست بوت نہ کنت۔
بلوچ سروک ءَ گْوشتگ کہ زور بیگواھی مردمگری ءِ بگیری ءَ یک میارے بلے پاکستان ءَ چنچو دھک اِنت کہ زورگِپتیں بلوچستان ءَ ھمے شوندات ءَ چو سلاھے ءَ کارمرد کنگ ءَ اِنت۔
رھیم ایڈووکیٹ ءَ گْوشتگ کہ دوئیں ھساب ءَ توری پاکستان ءِ پارلیمنٹ، سرکار ءُ آمیدگس ءِ دست گوں پاکستانی لشکر ءَ نہ رس ایت یاکہ دُرس شور اَنت ءُ پھازداری ءِ بنیاد ءَ زوربیگواھی ءَ گِر ءُ دار کُرت نہ کن اَنت۔اے یک راستی یے کہ پاکستان یک ناشریں ریاستے ءُ زورگپتیں بلوچستان ءَ مردمگری ءِ بگیری کنگ ءِ میار ءَ جُست گرگ بہ بیت۔
