بلوچ نیشنل مومنٹ ءِ پیشگیں سرکماش ءُ بلوچ سروک ھلیل بلوچ ءَ ماں چاگردی رسانکدر ایکس ءَ وتی یک پوسٹے ءَ نبشتگ کہ مئے کماش استاد واھد کمبر ءَ وتی سرجمیں زندگی پہ بلوچ جُھد ءِ راجی آجوئی ءَ داتگ۔آ پہ ما یک رژنائیں کشکے۔آئی ءِ باسمائی ءُ دیمونی ءَ بلوچ جُھد مھکم کُرتگ۔
آئی ءَ گْوشتگ کہ استاد ھما مردم اِنت کہ ما آئی ءِ سر ءَ پھر کن ایں۔آئی ءِ جُھد اے راستی ءِ گواہ اِنت کہ زور،زوراکی ءُ لُٹ ءُ پُل ءِ دیم ءَ اوشتوکیں مردم ھچبر پشت کِنز نہ بنت۔
آئی ءَ گْوشتگ کہ پاکستان بزانت کہ استاد واھد کمبر ءِ وڑیں سروک ءُ ائی ءِ ھمراھاں وتی جُھد ءِ تہ ءَ تچکے ءَ گْوشتگ کہ زوراکی ءِ بگیری ءَ بلوچ ھچبر بے توار نہ بیت۔ تئ زوراکی مارا مھکم کنت ءُ تئ زوراکی مئے جنگ ءَ تیز کنت۔
بلوچ سروک ءَ گْوشتگ کہ استاد واھد کمبر بلوچ راجی جُھد ءِ کماشیں سپاھی یے۔ ما پاکستان ءَ تچکی ءَ گْوش ایں کہ استاد واھد کمبر ءِ جُھد یک راجی توارے، تو ھرچی ایشی ءِ ایرماد کنگ ءِ جُھد ءَ بہ کن گیش چِست بیت۔ بلوچ راج پہ وتی راجی آجوئی ءَ ھرچ وڑیں دیمونی دیگ ءَ چک ءُ پد نہ بیت۔
آئی ءَ گْوشتگ کہ کماش استاد واھد کمبر ءِ جنک راج ءِ پُسگ اَنت ءُ راج وتی اے پُسگانی جنگ ءَ ھرچ کجا آیانی پلہ مرزی ءَ کنت۔
