کیچ ءِ بنجاھی شھر تُربت ءَ بلوچ راجی آجوئی جُھد ءِ کماشیں سروک استاد واھد کمبر ءِ زور بیگواھی ءِ بگیری ءَ زھرشانی روانکے کشگ بیتگ۔ روانک ءَ استاد واھد کمبر ءِ جنک مھلب کمبر، شاری کمبر ءُ زوربیگواھیں مردمانی کھولاں ھوار سیاسی ءُ چاگردی کارکناں بازیں کچ ئِے ءَ بھر زُرتگ۔
زھرشانی ءَ ھواریں مردماں استاد واھد کمبر ءَ ھوار آدگہ زور بیگواھیں مردمانی دیم ءَ آرگ ءِ لوٹ کُرتگ۔
استاد واھد کمبر ءَ پاکستانی لشکر ءِ چریکاں 19 جولائی ءَ چہ کرمان ءَ آوار جتگ ءُ پاکستان ءِ دست ءَ داتگ ءُ ھما اِنت کہ پاکستانی لشکر ءُ چیریں ادارہ آئی ءَ دیم ءَ آرگ ءَ نہ اَنت۔
تربت روانک ءَ استاد واھد کمبر ءِ جنک مھلب کمبر ءَ تران کُرتگ ءُ گْوشتگ کہ منی پت بلوچ راجی جُھدکارے ءُ آئی مدام پہ بلوچ ءَ جُھد کُرتگ۔ مرچی آ پاکستان ءَ آوار جتگ ءُ بیگواہ کُرتگ۔ مئے لوٹ ھمیش اِنت کہ دیم ءَ آرگ ءُ آمیدگس ءَ پیش کنگ بہ بیت۔
مھلب کمبر ءَ چہ انسانی ھکانی گل ءُ چہ ریڈ کراس ءَ دزبندی کُرتگ کہ اے جیڑہ ءِ سر ءَ دیم ءَ بیا اَنت ءُ استاد واھد کمبر ءِ دیم ءَ آرگ ءَ وتی کِرد ءَ پیلو بہ کن اَنت۔
اے درگت ءَ زھرشانی ءَ ھوار بیتگیں مردماں زوربیگواھیانی بند کنگ ءُ استاد واھد کمبر ءِ دیم ءَ آرگ ءِ لوٹ کُرتگ ءُ گْوشتگ کہ چہ پاکستانی ریاست ءِ ھمے زوراکیانی سْوب ءُ سیاسی مردمانی بے توار کنگ ءِ جُھداں جاور ناگیگ کُرتگ اَنت۔
روانک ءَ ھوار بیتگیں بیگواھیں مردمانی کھولاں ھم وتی مردمانی دیم ءَ آورگ ءِ لوٹ کُرتگ ءُ گْوشتگ کہ نہ آمیدگس مئے گپاں گوشدار ایت ءُ نہ کہ کمیشن ءَ مئے گپ گوشدارگ بنت۔ ما ھرکجا کہ رویں اود ءَ پاکستانی لشکر ءِ پلہ مرز نشتگ اَنت ءُ مارا بےتوار کنگ ءِ جُھد ءَ کن اَنت۔
گُڈی ءَ مردماں استاد واھد کمبر ءَ ھوار آدگہ زور بیگواھیں مردمانی دیم ءَ آرگ ءِ لوٹ کُرتگ۔
