کیچ: 19 جولائی ءَ پاکستانی لشکر ءِ چیریں ادارھانی دست ءَ زور بیگواہ کنگ بیتگیں آجوئی لوٹوکیں سروک استاد واھد کمبر ءِ جنک شاری کمبر ءُ مھلب کمبر ءَ وتی پت ءِ زوریں بیگواھی ءِ بگیری ءَ برجاھیں کمپین ءِ میان ءَ زھرشانی کنگ ءِ جار جتگ ءُ گوشتگ کہ مئے پت پاکستان ءِ چیریں ادارھانی کارمنداں زور بیگواہ کرتگ۔
استاد واھد کمبر ءِ جنکانی گوشگ اِنت کہ آ نوزدہ دسمبرءَ کیچ تربت ءَ زھرشانی روانکے کَش اَنت۔
مھلب کمبر وتی شنگ کرتگیں تامربندے ءَ گوشتگ کہ وھدے زوراکی وتی ھد ءَ سر گوزکنت گڑا آئی دیم ءِ دارگ ھمک باسمائیں مردمانی سر ءَ پرز بیت، چی ءَ کہ زوراکی ءِ ھلاسی ایمنی، انساپ ءُ انسانیت ءَ رکین ایت۔ بازیں وھد ءَ زوراکیانی بگیری ءَ مردم ءَ وتی زندمان، وتی وشی ءُ کھولانی دیمونی دیگ لوٹ ایت۔ استاد واھد کمبر ھمے جھد ءِ چیدگ اِنت۔ استاد واھد کمبر یک مھکمیں توارے بوتگ ءُ زوراکی ءِ بگیری ءَ جھد کرتگ۔
مھلب کمبر ءَ دیمتر ءَ گوشتگ کہ استاد واھد کمبر وتی زندگی ءِ پنجاہ سال پہ بلوچ راج ءَ ندر کرتگ۔ آئی ءَ چہ وتی باسمائی ءَ پہ بلوچ راج ءِ ھک ءُ نپاں جھد بندات کرتگءُ ھمک جاہءَ پہ وتی راج ءَ مڑگ ءَ بوتگ۔ مرچی ھم ریاستی ادارھاں آ بیگواہ کرتگ ءُ آزارجاھاں بند کرتگ ءُآئی توار ءِ دارگ ءِ جھد ءَکنگ ءَ اَنت۔ بلوچ راج ءَ سرپد بوگی اِنت کہ اے تیوک ءَاستاد واھد کمبر ءِ نہ بلکیں سرجمیں بلوچ راج ءِتوار اِنت۔
شاری کمبر ءُ مھلب کمبر ءَ زھرشانی ءِ بابت ءَ گوشتگ کہ 19 دسمبر 2024 ءَ کیچ ءَ چہ اتاد شاد وانشجاہ ءَ داں شھید پدا اھمد چاراہ ءَ روانکے کش ایں۔گوں درسیں مردم دوست، بلوچ راج ، سیاسی ءُ چاگردی کارکناں لوٹ کن ایں کہ زھرشانی ءَ بھر بزور اَنت ءُ دانکہ استاد واھد کمبر دیم ءَ آرگ ءُ آمیدگس ءَ پیش کنگ بہ بیت۔
