شال: وی بی ایم پی ءِ سرکماش نسرُالاہ ءَ ماں رسانکدر ءَ وتی شنگ کرتگیں درشانے ءَ گوشتگ کہ بیان دُر ءِ زوریں بیگواھی ءِ بگیری ءَ آئی کھول ءُ ھمبلیں نودربرانی زھرشانی نندانک ءَ پنچ روچ انت کہ لسبیلہ زانشجاہ ءِ مزنیں دروازگ ءِ دپ ءَ برجاہ اِنت۔
آئی گوشتگ کہ بیان دُر مشکے ءِ جھمنند اِنت ءُ لسبیلہ زانشجاہ ءِ نودربر اِنت۔ آ 29 نومبر ءَ گوں آئی ھمبلیں نودربر ناسر، گلاب ءُ بالاچ ءِ ھواری ءَ لشکر ءَ چہ اُتّل بازار ءَ بیگواہ کرتگ۔ رند ءَ آئی ھمراہ آجو کنگ بوتگ اَنت بلے بیان دُر انگت بیگواہ اِنت۔
نسرُلاہ ءَ کہ پہ بیان دُر بلوچ ءِ آجوئی ءَ آئی کھول ءُ نودربر لسبیلہ زانشجاہ ءِ مزنیں دروازگ ءِ دپ ءَ زھرشانی ءَ نشتگ اَنت ءُ آیانی زھرشانی نندانک ءَ پنچ روچ سرجم بوتگ۔ نہ بیان در آجو بوتگ ءُ نہ ھم آئی کھول ءُ سنگتان ءَ سرپدی دیگ ءَ اَنت۔
آئی گوشتگ کہ اے ڈیھ ءَ راھبند ءُ انسانی ھکّانی بگیری اِنت کہ ایشی ءَ ما گوں ترندی ءَ ایر جن ایں ءُ چہ سرکار ءَ لوٹ کن ایں کہ آ بیان دُر بلوچ ءِ کھول ءُ نودربرانی زھرشانی ءِ دلگوش بہ کنت ءُ بیان دُر ءِ پہ آجوئی ءَ وتی کرد ءَ پیلو بہ کنت ءُ آئی کھول ءُ نودربراں چہ اے درد ءَ بہ رکّین ایت۔
