آواران: چہ زور بیگواھیں دلجان ءِ کھول ءِ نیمگ ءَ آواران دمگدار ءِ کارگس ءِ دیم ءَ برجاھیں زھرشانی نندانک ءَ بلوچ وومن پورم ءَ پریس کانپریس کرتگ ءُ گوشتگ کہ 25 نومبر 2024 ءَ ھند ءِ انتزامیہ ءُ دل جان ءِ کھول ءِ میان ءَ گپ ءُ تران بوتگ اَت۔اے گپ ءُ تران ءَ ھندی مھتر آبد، ھاشم، ھبیب ءُ کادری ءَ ھوار دمگ ءِ اے سی مجیب الرھمان ھم ھوار اَت۔ گپ ءُ تران ھمے پیسلہ کنگ بوتگ اَت کہ دل جان ءِ کھول چہ دگ ءِ سر ءَ وتی زھرشانی ءَ ھلاس بہ کنت دو سے روچ ءِ میان ءَ دل جان کھول ءَ پیش دارگ بیت ءُ دلجان سی ٹی ڈی ءِ دست ءَ دیگ بیت۔
آئی ءَ گوشتگ کہ مرچی دلجان ءِ کھول ءِ گوں ھندی مھتر ءُ دمگی انتزامیہ ءَ گپ ءُ تران ءَ داتگیں وھد سرجم بوتگ۔ دل جان ءِ کھول ءِ لوٹ اِنت کہ دل جان آمیدگس ءَ پیش کنگ بہ بیت، نندانک ءَ ھواریں درسیں مردمانی بگیری ءَ ایپ آئی آر ھلاس کنگ بہ بنت۔ نندانک ءَ ھواریں مردمانی ترسینگ بند کنگ بہ بیت۔ دانکہ دلجان یل کنگ نہ بوتگ کھول ءِ زھرشانی نندانک برجاہ بیت۔
آئی ءَ گوشتگ کہ دل جان ءِ گھار ءِ نیمگ ءَ دمگدار ءِ کارگس ءِ دیم ءَ داں دلجان ءِ آجوئی ءَ داں مرگ شدکشیں ھرتال ءِ جار جنگ بوتگ۔ دانکہ دل جان آجو نہ بوتگ اے شدکشیں ھرتال برجاہ بیت۔
آئی ءَ گوشتگ کہ من ھمے گپ ءَ گوش آں بلوچ وومن پورم چہ بنداتی روچ ءَ دل جان ءِ کھول ءِ گون ءَ اوشتاتگ ءُ داں گڈی روچ ءَ ھم اوشت ایت۔
