سوراب: چہ گدر ءَ زورگریں پاکستانی لشکر ءَ زی دو مردم آوار جتگ ءُ بیگواہ کرتگ اَنت، کھولاں زھرشانی ءَ سی پیک ءُ شال کراچی شھدگ بند کرتگ اَنت۔
بیگواہ کنگ بوتگیں مردمانی نام شبیر اھمد ء بشیر اھمد ءُ ازیز اھمد ء ابداللہ اِنت۔ کھول ءَ آیانی زوریں بیگواھی ءِ بگیری ءَ سوراب زیروپوائنٹ ءَ سی پیک دگ ءُ شال کراچی شھدگ ھم زھرشانی ءَ بند کرتگ اَنت۔
زھرشانی ءَ سی پیک دگ ءِ بند بوگ ءِ سوب ءَ دوئیں نیمگاں گاڑیانی مزنیں کتار اوشتوک بوتگ اَنت۔ ھمے وڑ ءَ شال کراچی شھدگ ءِ بند بوگ ءِ سوب ءَ سدانی کچ ءَ گاڑی دوئیں دیم ءَ اشتوک بوتگ اَنت۔ مساپر سکا جنجالانی دیمپان بوتگ اَنت۔
مساپراں گوں انتزامیہ ءَ لوٹ کرتگ کہ گوں زھرشانی کنوکاں زوت گپ ءُ تران بہ کنت ءُ شھدگ ءَ پچ بہ کناھین ایت۔
