شال: وی بی ایم پی ءُ بلوچ وومن پورم ءَ پریس کانپریس کرتگ ءُ گوشتگ کہ مئے پریس کانپریس ءِ مول آواران ءَ دمگدار ءِ کارگس ءِ دیم ءَ پہ دلجان ءِ آجوئی ءَ زھرشانی ءَ نشتگیں جنین ءُ زھگانی نیمگ ءَ دلگوش کنگ اِنت کہ مرچی دلجان ءِ زوریں بیگواھی ءِ بگیری ءَ زھگ ءُ جنین پنچ روچ اِنت سارتی ءِ سر ءَ نشتگ اَنت آیانی لوٹ ھمیش اِنت دلجان ءِ سر ءَ چونیں بھتامے ھست دیم ءَ آرگ ءُ آمیدگس ءَ پیش کنگ بہ بیت آئی ءَ وتی بے میار کنگ ءِ ھک دیگ بہ بیت۔ اگاں بے میار اِنت گڑا زوت یل کنگ ءُ آئی کھول چہ رنجاں آجو کنگ بہ بیت۔
آئی ءَ گوشتگ کہ دلجان ءَ 12 جون 2024 ءَ چہ آواران ءِ ھند تیرتیج مزار آباد ءَ لشکر ءَ درکانودی آوار جتگ ءُ بیگواہ کرتگ۔ دلجان ءِ کھول ءَ آئی زوریں بیگواھی ءِ بگیری ءَ ھمے سال ءِ 4 اکتوبر ءَ دمگدار ءِ کارگس ءِ دیم ءَ زھرشانی نندانک ءَ نشتگ ءُ کھول ءِ نندانک داں چار روچ ءَ برجاہ بوتگ، آئیشہ زھری، اورنگزیب ءُ مجیب الرھمان ءَ کھول ءِ گون ءَ گپ ءُ تران کرتگ ءُ آیان ءَ دلجمی داتگ کہ دلجان داں دہ روچ ءَ گس ءَ سر بیت۔ بلے نوں یک ماھے گوستگ بلے انتزامیہ دلجان ءِ باروا آئی کھول ءَ ھچ وڑیں سرپدی دیگ ءَ نہ اِنت چہ ایشی سوب ءَ دلجان ءِ کھول پد ءَ دمگدار ءِ کارگس ءِ دیم ءَ پنچ روچ اِنت زھرشانی ءَ نشتگ ءُ پہ دلجان ءِ آجوئی ءَ لوٹ کنگ ءَ اِنت۔
آئی ءَ گوشتگ کہ کھول ءِ گون ءَ انساپ ءَ ابید لشکر آئی ءَ گوں جتائیں پیماں ترسینگ ءُ زھرشانی ءَ ھلاس کنگ ءِ بیھار ءَ دیگ ءَ اِنت، اے ڈیھ ءِ کانود ءُ مردمی ھکانی ناھکیں بگیری اِنت ایشی گوں ترندیں دانکاں ایر جن آں ءُ گوں بلوچستان سرکار ءَ لوٹ کن ایں کہ آ دمگدار ءِ کارگس ءِ دیم ءَ دلجان ءِ زوریں بیگواھی ءِ بگیری ءَ نندانک ءَ نشتگیں جنین ءُ زھگانی زھرشانی ءَ دلگوش بہ کنت ءُ گوں آیاں گپ ءُ ترا بہ کنت ءُ پہ دلجان ءِ آجوئی ءَ زوت دلجمی بہ دنت دانکہ دلجان ءِ زوریں بیگواھی ءِ سوب ءَ آئی کھول سسائی جنجالانی دیمپان اِنت چہ اندوھاں رکینگ بہ بیت۔
آئی ءَ گوشتگ کہ گوستگیں روچ ءَ مزن وزیر ءِ سروکی ءَ بوتگیں ایپکس کمیٹی ءَ بلوچستان ءَ لشکرکشی ءِ موکل داتگ اے بژنی گپے ءُ ما ایشی رد سرپد بہ ایں۔ اگاں بہ چار ئِے بلوچستان ءَ زور چکاسگ بوتگ گڑا جاور ھچ وڑ ءَ گھتر نہ بوتگ اَنت، بلکیں ھمک لشکرکشی ءَ پد جاور ناگیگ بوتگ اَنت۔بلوچستان ءَ ڈیھ ءِ کانود ءُ مردمی ھکانی ناھکیں بگیری بوتگ زوریں بیگواھی تیز کنگ بوتگ اَنت۔ ھزارانی کچ ءَ مردمانی لاش دزکپتگ اَنت ءُ لس مھلوک ءِ پہ زندگی ءَ ترسے ودی بوتگ۔
آئی ءَ گوشتگ کہ ما گوں سرکار ءَ لوٹ کن ایں کہ آ بلوچستان ءَ زور کارمرز مہ کنت ءُ پہ گپ ءُ تران ءَ جوانیں گامگیجے ءِ سوڑگ ءَ بہ کنت۔ سرجمیں بلوچستان ءَ کم گندی ءِ مارشت ءَ ھلاس بہ کنت ءُ پہ درسیں بیگواھیں مردمانی آجوئی ءَ دلجمی بہ دنت۔ کجام مردم ءِ سر ءَ چونیں بھتامے ھست آمیدگس ءَ پیش کنگ بہ بیت ءُ زور بیگواھیں مردمانی دروگیں میڑ ءَ کوش بند کنگ بہ بیت۔ ھما کہ ریاست ءِ میار بار اِنت آ سزا دیگ بہ بیت ءُ زوریں بیگواھی ءِ جیڑہ ڈیھ ءِ کانود ءِ پارست ءَ پہ گیش ءُ گیوار کنگ ءَ زور گامگیج زورگ بہ بیت۔
