بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں 10 نومبر 2024 ءَ یک شمبے ءِ بیگاہ ءِ پنچ ءَ کیچ ءِ ھند دشت کھڈان ءَ برجاھیں زورگریں پاکستانی لشکر ءِ بنجل چہ دو نیمگاں انگر کرتگ ءُ گوں نوک ءُ مزنیں سلاھاں اُرش کرتگ۔ اُرش ءَ پاکستانی لشکر ءِ یک سروگانے ءَ ھوار 16 کارمند جاھی مرتگ ءُ باز لشکری ٹپی بوتگ اَنت۔ اُرش ءَ دژمنیں لشکر ءَ سکا جانی تاوان بوتگ۔
آئی ءَ گوشتگ کہ چہ اُرش ءَ پیش سرمچاراں سرجمیں ھند ءِ روگ ءُ آھگ ءِ راہ بند کرتگ اَنت ءُ پد ءَ دژمن ءِ بنجل ءِ سر ءَ اُرش کرتگ۔ اُرش انچو ترند بوتگ کہ پروش وارتگیں زورگریں دژمنیں لشکر ءَ سر کشگ ءَ وار نہ بوتگ۔
جارکش ءَ گوشتگ کہ پہ دژمن ءِ کمک ءَ آتکگیں کارمندان ءَ نشانگ کرتگ ءُ دژمن ءَ گیش جانی ءُ مالی تاوان بوتگ۔
آئی ءَ گوشتگ کہ اُرش ءَ بی ایل ایپ ءِ انٹیلیجنس بھرگ ءُ کربان یونٹ ءِ ھمبلاں بھر زرتگ۔ سرمچاراں دژمنیں لشکر ءِ بنجل ءِ سر ءَ گوں نوک ءُ ٹوھیں سلاھاں ترندیں اُرش کرتگ ءُ بنجل ءِ نزیک ءَ سر بوتگ اَنت سرمچاراں بنجل ءِ پھازداریں دیوال ءُ سنگر گوں راکٹ ءِ گولایاں نشانگ کرتگ ءُ تباہ کرتگ اَنت۔ سرمچار دژمن ءِ بنجل ءَ پترگ ءُ بنجل ءِ سلاھانی دستیگی کنگی بوتگ اَنت کہ ھمے میان ءَ کربان یونٹ ءِ سرمچار لپٹینٹ جمال شھید بوتگ۔ ھمے سوب ءَ سرمچاراں شھیدیں ھمبل ءِ لاش زرتگ ءُ چہ اود ءَ سلامتی درکپتگ اَنت۔
جارکش ءَ گوشتگ کہ اے اُرش ءَ بی ایل ایپ ءِ سرمچار لیپٹینٹ جمال پنام ناکو ابراھیم ء مولابکش جاہ منند سری بازار تمپ، گومازی ءَ دژمن ءِ گون ءَ گوں جوانمردی ءَ جنگ داتگ ءُ شھید بوتگ۔
آئی ءَ گوشتگ کہ شھید جمال ءِ جھد، کرد ءُ دیمونی پما مادنیں راہ اَنت۔ ما آئی بے مٹیں جھد ءُ گرانبھائیں دیمونی ءَ ستک شانی ندر کن ایں۔
جارکش ءَ گوشتگ کہ شھید لپٹینٹ جمال سیاسی پارست ءَ پھتو ءُ چہ جنگی بودناکی ءَ سریچ ءُ آزمودگ کاریں سرمچارے بوتگ۔ آ چہ 2010 ءَ بلوچ آجوئی لوٹوکیں زرمبشت ءَ بی ایل ایپ ءِ گون ءَ ھمگرنچ بوتگ، داں دو سال ءَ شھری نیٹورک ءَ کار کنگ ءَ پد آ دژمن آئی باروا سرپد بوتگ گڑا 2012 ءَ بنجل ءَ شتگ ءُ سرجم ءَ ھوار بوتگ۔
آئی ءَ گوشتگ کہ شھید سرمچار لپٹینٹ جمال پنام ناکو ابراھیم ءَ سیاھجی، مزنبند، کلبر، زامران،بلیدہ ءُ بالگتر ءَ زورگریں لشکر ءِ بگیری ءَ کاروائیاں بھر زرتگ ءُ دژمن ءَ سکا جانی ءُ مالی تاوان داتگ۔ آ چہ وتی جپاکشی، جنگی بودناکی، نہ ترسی ءُ اوپار ءِ سوب ءَ یک بیسھی سنگتے بوتگ۔ شھید ءَ چہ وتی سیاسی باسمائی ءِ سوب ءَ گل ءِ ادارہ ءُ بنجل ءِ مھکمی ءَ یک جوانیں کردے پیلو کرتگ۔
جارکش ءَ گوشتگ کہ دشت کھڈان ارش ءَ شھید جمال سرمچارانی بنداتی ٹولی ” کربان یونٹ“ ءِ کمانی ءَ کنگ ءَ بوتگ۔ آ چہ ھمبلانی کمک ءَ بنجل ءِ نزیک ءَ سر بوتگ ءُ دژمن ءِ لڑانی تہ ءَ سرگنوکوئی ءُ پرشت پروش ودی کنگ ءَ سوبین بوتگ۔
آئی ءَ گوشتگ کہ شھید لپٹینٹ جمال یک سالے پیش کربان یونٹ ءَ ھوار بوتگ ءُ وتی زمہ واری شریں وڑے ءَ پیلو کرتگ اَنت۔ اے اُرش ءَ کربان یونٹ ءِ ھمبلانی کمانی کرتگ ءُ شھید بوتگ گوستانک ءِ تاکدیماں پہ مدامی ابدمان بوتگ۔
جارکش ءَ گوشتگ کہ بی ایل ایپ لس مردمانی کمک ءُ پلہ مرزی ءَ یک مھکمیں جنگی ءُ سیاسی کارے ءَ دژمن ءَ زوت چہ وتی سرڈگار ءَ پہ درکپگ ءَ لاچار کنت ءُ ھما وڑ ءَ دشت ءِ مردماں گوں سرمچاراں شریں وڑے ءَ کمک کرتگ ءُ پیش داشتگ کہ بلوچ لس مردم سرمچارانی گون ءَ اوشتاتگ اَنت۔
اُرش ءِ تامر ءَ زوت رسانکدر ءَ شنگ کن ایں۔
میجر گھرام ءَ گوشتگ کہ بی ایل ایپ وتی شھیدیں ھمبل جمال ءَ ستک شانی ندر کنت ءُ ھمے کول ءَ کنت کہ داں بلوچستان ءِ آجوئی ءَ زورگریں لشکر ءِ سر ءَ ارشاں برجاہ دار ایت ءُ لس بلوچانی کمک ءَ وتی راجی آجوئی ءِ مول ءَ سوبین بیت۔
