تربت: چہ بلوچستان زانشتجاہ شال ءَ زورگریں پاکستانی لشکر ءِ دست ءَ زور بیگواہ کنگ بوتگیں سھیل ءُ پسی ءِ زوریں بیگواھی ءِ سے سال سرجم بوگ ءَ نودربراں زھرشانی کرتگ۔
زھرشانی روانک چہ بلوچ اسٹوڈنٹس ایکشن کمیٹی ءِ نیمگ ءَ کشگ بوتگ، چہ اتا شاد وانشجاہ ءَ در کپتگ ءُ شھید پدا اھمد چاراہ ءَ مچ بوتگ اَنت۔ زھرشانی ءَ بساک ءِ بنجاھی سرکماش شبیر، بی وائی سی ءِ سروک سبگت اللہ، بچک ءُ جنکیں نودربراں ھوار سیاسی، چاگردی کارکناں بازیں کچے ءَ بھر زرتگ۔
زھرشانی ءَ آیاں تران کرتگ ءُ گوشتگ کہ سھیل ءُ پسی 2 نومبر ءِ شپ ءَ چہ بلوچستان زانشتجاہ ءِ وابجاہ ءَ آوار جنگ ءُ بیگواہ کنگ بوتگ اَنت۔ پہ آیانی آجوئی ءَ نودربراں باز بر ءَ زھرشانی ھم کرتگ بلے انگت ءَ پہ آیانی آجوئی ءَ ھچ وڑیں گامگیج زورگ نہ بوتگ۔
آیاں گوشتگ کہ گوستگیں شپ ءَ اسلام آباد ءَ دہ نودربر زور بیگواہ کنگ بوتگ اَنت اے ھمے گپ ءَ پدر کنت کہ بلوچ نودربر پاکستان ءِ کجام ھم کنڈ ءَ پھریز نہ اَنت۔
آیاں گوشتگ کہ سھیل ءُ پسی ءَ ھوار درسیں زور بیگواھیں نودربر زوت آجو کنگ بہ بنت۔
