ھب چوکی: پاکستانی لشکر ءِ دست ءَ زور بیگواہ کنگ بیتگیں ورنا جنید ھمید ءُ یاسر ھمید ءِ کھول آیانی یل نہ کنگ ءِ بگیری ءَ لسبیلہ پریس کلب ءِ دیم ءَ داں سے روچ ءَ زھرشانی ءَ نشتگ۔
زھرشانی نندانک ءَ زور بیگواھیں مردمانی کھول، بلوچ یکجھتی کمیٹی ءَ ھوار آدگہ سیاسی ءُ چاگردی گلانی کارکناں بھر زرتگ۔ پہ زھرشانی ءِ ھلاس کنگ ءَھب پولیس دزمانجنی ءِ جھد ءَ کنگ ءَ اِنت۔
زور بیگواھیں جنید ھمید ءُ یاسر ھمید ءِ کھول ءِ گوشگ اِنت کہ زھرشانی ءِ سیمی روچ ءَ ھب چوکی ءَ زھرشانی روانکے ھم کشگ بیت۔
آیاں گوں ھب چوکی ءُ کِر ءُ کشانی مردماں لوٹ کرتگ کہ آ بیا اَنت ءُ زھرشانی نندانک ءَ بھر بزور اَنت ءُ پہ بیگواھیں مردمانی آجوئی ءَ توار چست بہ کن اَنت۔
