شال: پہ زور بیگواھیں مردمانی پدجنگ ءَ وی بی ایم پی ءِ شدکشیں زھرشانی گدان ءَ 5623 روچ سرجم بوتگ۔ آدینگ ءِ روچ ءَ چہ نوشکے ءَ سیاسی ءُ چاگردی کارکن نورمھمد جمالدینی، پیاز اھمد بادینی، الاھی بکش مینگل ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ جھان ءَ بے کساس مردم روگ ءَ اَنت بلے چہ درساں جتا ءُ زندگیں پجارے ھما مردم دار اَنت کہ آ وتی زندمان ءَ پہ یک گرانبھائیں مولے ءَ ببا دے اَنت۔ بلوچ گوستانک چہ اے وڑیں توکل ءُ دیمونی دیوکیں پسگانی کرد ءَ سریچ اِنت کہ آیاں پہ ماتیں سرڈگار ءِ آجوئی ءُ پدریچ ءَ وتی جان ندر کرتگ ءُ ماتیں سرڈگار ءِ دلبند ءَ گوں شانے ءَ وپتگ اَنت۔
آئی ءَ گوشتگ کہ ماتیں سرڈگار ءِ پہ اے نہ ترس ءُ گرانبھائیں پسگانی سالروچ ءَ ھمک سال ءِ وڑ ءَ اے 13 نومبر ءَ شھیدانی روچ ءَ دار ایں بلے روچ ءَ شھیدانی یاد ءَ وی بی ایم پی ءِ زھرشانی گدان ءَ بیگاہ ءِ چار ءَ ڈیوا بالینگ بیت ءُ آیاں ستک شانی ندر کن ایں۔
ماما کدیر گوشتگ کہ گوں درسیں مردمی ھکانی داراہ، وکیل ءُ ھمک بھرگاں سیادی داروکیں مردماں ابید شھید ءُ زور بیگواھیں مردمانی کھولانی گون ءَ لوٹ کرتگ کہ آ پہ شھیدانی ستک شانی ندر کنگ ءَ شریں وڑے ءَ بھر زرتگ۔
