شال: بیگواھیں بلوچانی توار ( وی بی ایم پی ) ءِ سرکماش نسر اللہ ءَ ماں رسانکدر ءَ وتی شنگ کرتگیں درشانے ءَ گوشتگ کہ مھمد الی لھڑی ءِ زوریں بیگواھی ءِ کیس آئی زھگ ءَ گل ءِ کِر ءَ یاداشت کرتگ۔
ھالد ھسین لھڑی ءَ گوں گل ءَ گوشتگ کہ آئی پت مھمد الی لھڑی ء مھمد ھسین ءَ پاکستانی لشکر ءَ 8 اکتوبر 2017 ءَ گوں آئی ھواری ءَ چہ مستونگ ءِ ھند کانک ءَ پاکستانی لشکر ءُ چیریں ادارھانی کارمنداں درکانودی آوار جتگ ءُ بیگواہ کرتگ۔
مھمد ھسین ءَ گوشتگ کہ آ یک ماھے ءَ پد یل کنگ بوتگ بلے آئی پت مھمد الی انگت ءَ ڈیھ ءِ ادارھانی بندیگ اِنت۔ آئی ءَ پہ وتی پت ءِ آجوئی ءَ ھمک دروازگ ٹک اتگ بلے انگت ءَ آئی ءَ پت ءِ باروا ھچ وڑیں سرپدی دیگ نہ بوتگ چہ ایشی آئی کھول سکا رنجانی دیمپان اِنت ءُ سسائی نادراہ جوڑ بوتگ اَنت۔
نسر اللہ ءَ گوشتگ کہ گل ءَ مھمد ھسین ءَ دلجمی داتگ کہ آئی پت مھمد الی ءِ کیس ءَ سرکار، پہ بیگواھیں مردماں جوڑ کرتگیں کمیشن ءُ اکوام متھدہ ءِ ورکنگ گروپ پہ زوریں بیگواھی ءَ جوڑ بوتگ دیگ بیت ءُ پہ آئی آجوئی ءَ ھمک جاہ ءَ توار چست کن ایں۔
نسر اللہ ءَ گوشتگ کہ مھمد الی ءِ دراجکشیں زوریں بیگواھی ڈیھ ءِ کانود ءُ مردمی ھکانی ناھکیں بگیری اِنت۔
