شال: بیگواھیں بلوچانی توار ( وی بی ایم پی ) ءِ سرکماش نسراللہ ءَ وتی شنگ کرتگیں درشانے ءَ گوشتگ کہ مھمد نور ء یار مھمد مری ءِ کھول ءَ آئی زوریں بیگواھی ءِ کیس وی بی ایم پی ءِ کِر ءَ یاداشت کرتگ۔
کھول ءِ گوشگ اِنت کہ مھمد نور مری ء یار مھمد ءَ ھمے ماہ ءِ دوازدہ ءَ پاکستانی لشکر ءَ چہ ھرنائی ءِ پیر ساھب پانگس ءَ درکانودی آوار جنگ ءَ پد بیگواہ کرتگ ءُ آئی کھول ءَ مھمد نواز مری ءِ باروا ھچ وڑیں سرپدی دیگ ءَ نہ اَنت۔ چہ ایشی کھول سکا جنجالانی دیمپان اِنت۔
نسر اللہ ءَ گوشتگ کہ گل ءِ نیمگ ءَ کھول دلجمی دیگ بوتگ کہ مھمد نور ءِ کیس سرکار ءُ پہ بیگواھیں مردماں جوڑ کنگ بوتگیں کمیشن ءَ سر کنگ بیت ءُ پہ آئی آجوئی ءَ ھمک جاہ ءَ توار چست کن ایں۔
آئی ءَ گوں سرکار ءَ لوٹ کرتگ ءُ گوشتگ کہ مھمد نور مری ءِ سر ءَ چونیں بھتامے ھست گڑا دیم ءَ آرگ ءُ آمیدگس ءَ پیش کنگ بہ بیت، اگاں بے میار اِنت گڑا زوت یل کنگ بہ بیت۔آئی کھول چہ رنجاں کشگ بہ بیت۔
