نوشکے: بلوچ یکجھتی کمیٹی ءِ نیمگ ءَ زوریں بیگواھیانی بگیری ءَ برجاھیں زھرشانیانی درچ ءَ نوشکے ءَ زھرشانی کنگ بوتگ۔
زھرشانی ءَ بی وائی سی ءِ کارکن، زور بیگواھیں مردمانی کھول، سیاسی ءُ چاگردی کارکناں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔
زھرشانی کنوکیں مردماں زور بیگواھیں مردمانی اکس ءُ پلے کارڈ دستاں بوتگ اَنت ءُ آیاں زوریں بیگواھی ءِ بگیری ءَ اوگام جتگ ءُ درسیں زور بیگواھیں مردمانی آجوئی ءِ لوٹ کرتگ۔
زھرشانی ءَ مردماں تران کرتگ ءُ گوں اکوام متھدہ ءُ آدگہ میان استمانی مردمی ھکانی ادارھاں لوٹ کرتگ ءُ گوشتگ کہ پہ درسیں زور بیگواھیں مردمانی آجوئی ءَ گامگیج بزور اِت ءُ زوریں بیگواھی ءِ گِر ءُ دار کنگ ءَ وتی کرد ءَ پیلو بہ کن اِت۔
یات بہ بہ اِت کہ بلوچ یکجھتی کمیٹی ءِ نیمگ ءَ زوریں بیگواھیانی بگیری ءَ زھرشانیانی درچ ءَ کراچی، ھب چوکی، ھزدار، تربت، پنجگور، ھاران، شال ءُ مرچی نوشکے ءَ زھرشانی کنگ بوتگ۔
