آواران: مشکے ءَ زورگریں پاکستانی لشکر ءِ جوڑ کرتگیں کشندہ ٹولی ءِ کارمنداں تیرگواری کرتگ ءُ دو مردم کشتگ۔
کشگ بوتگیں براتانی نام ابدالھک ء جنگی ھان ءُ لیاکت ء نیک سال اِنت کہ مشکے منجو ءِ جاہ منند اَنت۔ کشندہ ٹولی کارمنداں گجر بازار ءَ نشانگ کرتگ ءُ کشتگ اَنت۔
انچوش گوشگ بوگ ءَ اِنت کہ چہ ایشاں پیش ابدالھک ءِ یک براتے ایسا ء جنگی ھان ءَ پاری 30 جون ءَ کشندہ ٹولی ءِ کارمنداں نشانگ کرتگ ءُ کشتگ ءُ آئی کسانیں زھگ سمیر ٹپی بوتگ۔
چہ ایشی پیش چاردہ مارچ 2018 ءَ ایشانی گسانی سر ءَ اُرش کنگ بوتگ ءُ ابدالھالک ءِ زامات مبارک ء لشکری ءُ آئی ءِ زھگ مھبت ھان ءَ تیرگواری کرتگ ءُ کشتگ اَنت۔
ھندی بنشون ءِ رد ءَ اے مردم سک دیر اِنت کہ چہ پاکستانی لشکر ءِ زوراکیاں لڈ ءُ بار اِش کرتگ ءُ مشکے پروار ءَ آرتک اَنت۔
ابدالھک ء جنگی ھان باز بر ءَ پاکستانی لشکر ءَ آوار جتگ ءُ بیگواہ کرتگ چہ بازیں آزاراں پد یل داتگ۔
ابدالھک پاری وتی سر ءَ بوتگیں ریاستی زوراکیانی بگیری ءَ کانپریس ھم کرتگ اَت ءُ آئی کانپریس ءِ تامربند ریڈیو زرمبش ءَ ھم شنگ کرتگ۔
