بلوچستان آجوئی سنگر ( بی ایل ایپ ) ءَ چہ وتی رسانکدری تندجاہ ” آشوب” ٹیلیگرام چینل ءَ جتائیں کاروائیانی تامر شنگ کرتگ۔
اے تامربند ءِ تہ ءَ آواران بازار ءَ پاکستانی لشکر ءِ مزنیں بنجل ءِ سر ءَ مارٹر اُرش، آواران مشکے دگ ءَ بند ساچی شرکت ءِ پھازداریں کارمندانی سر ءَ اُرش ءُ پنجگور ءِ ھند چتکان گریب آباد ءَ کشندہ ٹولی ءِ کارمندانی سر ءَ اُرش ءِ تامر ھوار اِنت۔
شنگ بوتگیں تامر ءَ بی ایل ایپ ءِ جنگولانی مارٹر گولا ءِ آس دیگ ءُ بنجل ءَ کپگ، بند ساچی شرکت ءِ پھازداریں کارمندانی نشانگ کنگ، کشندہ ٹولی ءِ کارمندانی سر ءَ اُرش ءُ بی ایل ایپ ءِ جنگولانی وتی کاروائی ءِ نیمگ ءَ روگ ءِ ندارگ شریں وڑے ءَ گندگ بیت۔
اے اُرشانی باروا بی ایل ایپ ءِ نیمگ ءَ شنگ بوتگیں درشان ءِ رد ءَ 26 جولائی ءَ شپ ءِ ھشت ءَ پنجگور ءِ ھند چتکان گریب آباد ءَ کشندہ ٹولی ءِ کارمندانی سر ءَ اُرش ءَ دو کارمند لتیپ ء جلیل ءُ امان اللہ ء ھسین مرتگ اَنت ءُ آسپ ء دل مراد ٹپی بوتگ۔
آواران بازار ءَ بی ایل ایپ ءِ سرمچاراں 14 ستمبر ءَ بیگاہ ءِ شش ءَ گوں نوکیں سلاھاں مزنیں بنجل ءِ سر ءَ چہ دو نیمگاں اُرش کرتگ، ارش داں بیست دمان ءَ برجاہ بوتگ۔ چار کارمند مرتگ ءُ سے ٹپی بوتگ اَنت۔ اے اُرش ھما وھد ءَ کنگ بوتگ کہ بریگیڈیئر ھسن مھدی ءُ دگہ بازیں لشکری سروگان ساڑی بوتگ اَنت۔
میجر گھرام ءَ گوشتگ کہ بی ایل ایپ ءِ سرمچاراں 15 ستمبر ءِ سھب ءَ ھشت ءُ چل ءُ پنچ ءَ آواران مشکے ءِ دگ ءَ بند ساچی شرکت ءِ پھازداریں کارمندانی سر ءَ گوں نوکیں سلاھاں اُرش کرتگ۔ اُرش ءِ آسر ءَ یک کارمندے مرتگ ءُ دومی ٹپی بوتگ۔
