شال: پہ زور بیگواھیں مردمانی پدجنگ ءَ وی بی ایم پی ءِ زھرشانی گدان ءَ 5609 روچ سرجم بوتگ انگت برجاہ اِنت۔ آدینگ ءِ روچ ءَ چہ مستونگ ءَ سیاسی ءُ چاگردی کارکن مھمد ازیم، نور مھمد، دستگیر ءَ ھوار دگہ مرد ءُ جنین پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ چہ سالاں بلوچستان ءَ برجاھیں چکچینی ءَ ریاست ھمک روچ تیز کنگ لوٹگ ءَ اِنت۔ مردم آوار جنگ ءُ زور بیگواہ کنگ ءُ آیاں رستری آزارانی نشانگ کنگ ءُ شھید کنگ ءَ پد آیانی ژانگولیں لاشاں چگل دیگ ءَ اِنت، اے رستری کارپد یکشل ءَ برجاہ اَنت کہ ریاست پاکستان ھمے بلوچ چکچینی ءَ انگت ءَ تیز کنگ ءَ اِنت۔ نوں بلوچ شھریانی گسانی سر ءَ بمبگواری کنگ،چادر ءُ چار دیوالیانی پدمال کنگ ءُ رند ءَ سوچ ءِ درچ برجاہ اِنت۔
آئی ءَ گوشتگ کہ ریاست ءِ نیمگ ءَ بلوچ چکچینی ءِ یک نوکیں ھالے رستگ کہ کوھلو کاھان ءَ لشکرکشی ءِ میان ءَ نو بلوچ شھید کنگ بوتگ اَنت۔ لاش اِش پہ ھژدری چار ءُ ٹپاس ءَ نادراھجاہ ءَ برگ بوتگ اَنت نادراھجاہ ءَ لشکر ءَ زوراکی کرتگ ءُ مردمان ءَ چارگ ءِ موکل نہ داتگ۔ ھمے سوب ءَ لاشاں بوہ کرتگ۔ بوت کنت اے بیگواھیں مردم مہ بنت، بلے بلوچستان ءَ پہ مردمگری ءَ یک تباھی یے ودی بوتگ۔
ماما کدیر گوشتگ کہ ریاستی لشکر ءَ گوستگیں دو ماہ اِنت زوراکی تیز کرتگ اَنت ءُ نوں ریاست میان استمانی کانود ءَ ھم مان نیار ایت۔ پہ بلوچ ایمنیں جھد ءِ دارگ ءَ سرانی برگ ءَ چک ءُ پد نہ بیت۔
