جان میکڈونل ءَ بی این ایم ءِ چیئرمین ءَ دلجمی داتگ کہ آ بلوچانی پلہ مرزی کنت۔
بلوچ راجی زْرمبشت ( بی این ا یم ) ءِ سرکماش ءَ ماں برتانیائی پارلیمان ءَ گوں برتانیائی پارلیمان ءِ باسک جان میکڈونل ءَ گندک کرتگ ءُ آ بلوچستان ءِ نوکتریں جاورانی بارو ءَ سھی کرتگ۔
جان میکڈونل ءَ مردمی اگبال ءُ دگہ جیڑھانی سر ءَ بی این ا یم ءِ چیئرمین دلجمی داتگ کہ آ شریں وڑے ءَ بلوچانی پلہ مرزی کنت۔
بی این ایم ءَ ستمبر ءِ میان ءَ بلوچستان ءِ راجی آجوئی ءِ زْرمبشت ءُ مردمی اگبالانی جاور ءِ سھرا کنگ ءَ مزنیں تکے ءَ وتی سرگرمیانی بندات کرتگ کہ آیانی سروکی بی این ایم ءِ سرکماش کنگ ءَ اِنت۔اے رد ءَ آئی ءَ راجانی سنت ءِ 57 می مردمی اگبالانی پتر ءِ نیاد ءِ میان ءَ بیتگیں گپ ءُ تْرانانی تہ ءَ ابید بازیں دگہ نیاداں ھم بھر زرتگ ءُ گوں جتائیں تْرامگیجانی جھگیراں گندک کرتگ۔
اے سرگرمیانی دومی پدانک ءَ آ ماں برتانیا ءَ ساڑی اِنت ءُ اد ءَ گل ءِ تھی مراگش ، جھانی سندی کانگریس ءِ نیاد ءَ بھر ئِے زرتگ ءُ بلوچانی دزواھیں برتانیائی سیاستدان جان میکڈونل ئِے گندک کرتگ۔
جان میکڈونل برتانیا ءِ نامی ئیں سیاستدان اِنت کہ چاگردی مزدانک ، پہ نابرابری ءِ آسر کنگ ءَ گزرانکی شونداتانی گھتری ، ڈیموکریٹک سوشل ازم ، میان استمانی ایمنی ءُ اگوازی داشت ( ماحولیاتی استحکام ) ءِ پلہ مرزی ءِ سر ءَ پجارگ بیت۔
گْوستگیں باز وھد اِنت کہ آ بلوچستان ءَ مردمی اگبالانی جاور ءِ سر ءَ ماں برتانیائی پارلیمان ءَ وتی بے تاھیریاں درشان کنان اِنت۔بلوچستان ءَ مردمی اگبالانی بگریانی سھرا کنگ ءُ بلوچ وتواجھی ءِ پلہ مرزی کنگ ءِ پد ءَ جان میکڈونل بلوچ سیاسی کارکنانی میان ءَ پرمنگھیں بستارے ءِ واھند اِنت۔
اے گند ک ءِ تہ ءَ بی این ایم ءِ چیئرمین ءِ ھمراھی ءَ بی این ایم ءِ کستریں کمک کارگشاد ھسن دوست ، دری کارانی رھوتکار پھیم ءُ کمک رھوتکار نیاز گون بیتگ اَنت۔
بنشون: درشان / اکس: بی این ایم
