بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ 21 ستمبر 2025 ءِ شپ ءِ نو ءَ بی ایل ایپ ءِ سرمچاراں بارکان ءِ ھند اوچڑی ءَ برجاھیں پاکستانی لشکر ءِ پانگس ءُ موبائل ٹاور ءِ سر ءَ اُرش کرتگ ءُ مشین ءُ سامان مانداشتگ اََنت۔ اُرش ءَ پد زوت کشندہ ٹولی ءِ کارمند ھمے جاہ ءَ سر بوتگ اَنت ءُ تیرگواری اِش بندات کرتگ۔ سلاہ بندیں سرکاری کشندہ ٹولی ءِ یک ٹولی یے ءَ سرمچارانی رندگیری بندات کرتگ، ایشانی ودار ءَ پیسر ءَ سرمچاراں سنگر گپتگ ءُ نشتگ اَنت۔ یات بہ بہ اِت کہ زورگریں پاکستانی لشکر ءِ کمک ءَ برجاھیں کشندہ ٹولی ءِ کارمنداں مزنیں وھدے بیت کہ ھمے ھند ءَ ٹولیانی دروشم ءَ ترّ ءُ گرد کنگ ءَ اَنت دانکہ باجگری ءُ لس مردماں بہ ترسین اَنت۔ سرمچارانی لشکر ءِ پانگس ءُ موبائل ٹاور ءِ ماندارگ ءِ مول ریاستی مزن وزیر سرپراز بگٹی ءُ آئی برات آپتاب بگٹی ءِ چیردستی ءَ برجاھیں کشندہ ٹولی ءَ چہ اے مھکمیں جاہ ءَ کشگ ءُ تاوان دیگ بوتگ ءُ آیان ءَ باجگری ءِ سزا دیگ بوتگ، ایشی ءَ سرمچار سوبین بوتگ اَنت۔
آئی ءَ گوشتگ کہ سرمچاراں جوانیں شوربندی ءِ پارست ءَ کاروائی ءِ سرجم ءَ سوبین کنگ ءَ پد کشندہ ٹولی ءِ کارمندانی مھکمیں جاھے ءَ ودار کرتگ۔ چو مدامی وڑ ءَ کشندہ ٹولی ءِ کارمنداں سرمچارانی رندگیری کرتگ۔کشندہ ٹولی ءِ کارمند ھما جاہ ءَ سر بوتگ اَنت، چوش کہ سرمچاراں پیسر ءَ سنگر گپتگ ءُ نندوک بوتگ اَنت آیانی سر ءَ ترندیں اُرش کرتگ۔ اے جنگ 21 ستمبر ءِ شپ ءَ بندات بوتگ ءُ داں 22 ستمبر ءَ برجاہ بوتگ، ھمے میان ءَ کشندہ ٹولی ءِ یازدہ کارمند مرتگ ءُ باز ٹپی بوتگ اَنت۔ سکا ٹپی بوتگینانی تہ ءَ بلوچستان ءِ وتگڑیں مزن وزیر سرپراز بگٹی برات آپتاب ھم ھوار بوتگ۔ 23 ستمبر ءَ دگہ یک جاھے ءَ سرمچار ءُ کشندہ ٹولی ءِ کارمندانی میان ءَ میڑے بوتگ ایشی کشندہ ٹولی ءِ دگہیک کارمندے مرتگ۔ 24 ستمبر ءِ شپ ءَ کشندہ ٹولی ءِ دو کارمند سرمچاراں دگہ یک ارشے ءَ کشتگ اَنت۔
جارکش ءَ گوشتگ کہ اے آپریشن ءَ ھمسنتیں گل بی ایل اے ءُ بی آر جی ءِ سرمچار بی ایل ایپ ءِ گون ءَ کمک کنگ ءَ بوتگ اَنت۔ چہ اے آپریشن ءَ پد سرمچار وتی مھکمیں بندر ءِ نیمگ ءَ روگ ءَ بوتگ اَنت ءُ پہ سلامتی یک مکھمیں بندرے ءَ شتگ اَنت۔ بلے 27 ستمبر ءَ چتری گورچاتی ءَ پاکستانی لشکر ءُ کشندہ ٹولی ءِ کارمنداں سرمچارانی انگر کنگ ءِ جھد کرتگ ایشی آسر ءَ دگہ میڑے بندات بوتگ۔ ایشی پاکستانی لشکر ءُ کشندہ ٹولی ءِ سے کارمند مرتگ۔ وھدیکہ ترندیں اُرش ءِ میان ءَ ھمبلیں گل بی ایل اے ءِ سرمچار امران لانگو پنام میرین شھید بوتگ آئی گل ستک شانی ندر کنت۔
آئی ءَ گوشتگ کہ شھید امران لانگو یک نہ ترس، جنگ زانت ءُ وتن دوستی ءَ چکاریں سرمچارے بوتگ آ گوستگیں سالے نیمے بیت کہ گوں بی ایل اے ءَ ھمگرنچ اِنت، شھید سنگت امران لانگو ءَ گوں جوانیں جنگی شوربندی ءَ دژمن ءِ دیم داشتگ ءُ وتی آدگہ ھمبل پہ سلامتی چہ انگر ءَ کش اِتگ اَنت ءُ گڈی تیر ءِ لیکہ ءِ سر ءَ کار کرتگ ءُ نمیران بوتگ۔
جارکش ءَ گوشتگ کہ سرپراز بگٹی کشندہ ٹولی ءِ بگیری ءَ سوبمندیں آپریشن ءَ ٹکی رنگے دیگ ءِ جھد کرتگ ءُ مسوری بگٹی ٹک گوں کشندہ ٹولی ءَ ھوار کرتگ ءُ سرمچارانی دیم پہ دیمی ءَ اوشتارینگ ءِ جھد کرتگ، ما گوں مسوری بگٹی ٹک ءَ لوٹ کن ایں سرپراز ءُ چہ آئی کارمنداں وت ءَ گستا بدار اِت ءُ ایشانی میارباریانی تہ ءَ ھوار مہ کپ اِت۔ چی ءَ کہ بی ایل ایپ پہ بلوچستان ءِ آجوئی ءَ جنگ ءَ مڑگ ءَ اِنت ایشی گوں بلوچ ءِ ھچ وڑیں مردم یا ٹک ءَ ھچ وڑیں دژمنی نیست، پمیشکا بلوچ یا دریں مردم یا ٹولی زورگریں پاکستانی لشکر ءُ چیریں ادارھانی کمکار بوت آیانی گون ءَ ھما وڑ کنگ بیت گوں زورگریں دژمن ءَ کنگ بوگ ءَ اِنت۔
آئی ءَ گوشتگ کہ بلوچ سرمچارانی بنیاد گوں لس مردماں بندوک اِنت۔ سرمچارانی ھر پیمیں کاروائی مردمانی کمک ءِ سوب ءَ سوبین بیت۔ ما گوں مردمانی زور ءُ کمک ءَ بلوچ راج ءُ بلوچستان ءَ آجو کن ایں۔
جارکش ءَ گوشتگ کہ زورگریں ریاست ءُ آئی لگوریں لشکر سرپراز بگٹی ءِ وڑیں زرگپتانی پارست ءَ سرجمیں بلوچستان ءَ سادگیں مردماں رد دیگ ءُ کشندہ ٹولی ءَ ھوار کنگ ءَ اَنت اے دژمن ءِ چالاکی ءُ مکاری اِنت۔ اے شوربندی ءِ سوب ھمیش اِنت کہ پروش وارتگیں باڑھی لگوریں لشکری بلوچ سرمچارانی بگیری ءَ مڑ اِت نہ کن اَنت پمیشکا انگریزانی کارپداں پنجاپی ھمائی وڑ ءَ آسن ءَ گوں آسن ءَ برگ، ءُ میڑینگ ءُ سرکاری کنگ ءِ ھیلہ ءَ کارمرز کنگ ءَ اَنت دانکہ بلوچانی دیم ءَ بلوچاں بیار ایت ءُ لگوریں دژمنیں لشکریانی جان بہ رک ایت۔ ما گوں جیونی ءَ داں ڈیرہ گازی ھان ءَ درسیں ازتداریں بلوچانی گون ءَ لوٹ کن ایں کہ دوست ءُ دژمن ءَ بہ زان اَنت ءُ پاکستان ءِ زرگپتیں بدکردانی گون ءَ ھوار مہ بنت۔ درسیں بلوچانی سر ءَ پرز بیت کہ سرمچارانی راجی کاروان ءَ ھوار بہ بنت ءُ گوستانک ءِ تہ ءَ وت ءَ زندگ بدار اَنت۔ انچوش کہ شھید امران جان لانگو چہ جھلوان ءَ آتکگ ءُ روکپتی بلوچستان ءَ وتی ھون رتکگ اَنت ءُ پہ سرڈگار ءَ دیمونی داتگ آئی شون داتگیں راہ ءَ وتی بہ کن اِت۔
میجر گھرام ءَ گوشتگ کہ بی ایل ایپ شھید سنگت امران لانگو پنام میرین ءَ سرک شانی ندر کنت ءُ شھیدانی کاروان ءَ داں گڈی منزل ءَ سر کنگ ءِ کول ءَ کنت۔
بنشون: درشان / اکس: زرمبش
