بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں مچ، تربت ءُ مستونگ ءَ زورگریں پاکستانی لشکر سے جتائیں اُرشاں نشانگ کرتگ ءُ کشندہ ٹولی ءِ یک کارمندے ءِ کوش ءَ ھوار بی ایل اے ءِ دزگیر کرتگیں ملٹری انٹیلیجنس ءِ یک چاریگے ءَ مرگ ءِ سزا داتگ۔
آئی ءَ گوشتگ کہ بی ایل اے ءِ سرمچاراں دوشی بولان ءِ ھند مچ ءَ پنیر اسٹیشن ءِ سر ءَ زورگریں پاکستانی لشکر ءِ کارمند یک اُرشے ءَ نشانگ کرتگ اَنت۔ سرمچاراں گوں اسنائپر اُرش ءَ یک دژمنیں کارمندے ءِ کشگ ءَ پد دژمن ءِ پانگس ءِ سر ءَ گوں وتکارسلاھاں اُرش کرتگ۔ چہ ایشی آسر ءَ دژمن ءَ گیش جانی ءُ مالی تاوان بوتگ۔
جارکش ءَ گوشتگ کہ بی ایل اے ءِ سرمچاراں مرچی تربت ءِ ھند نودز ءَ زورگریں پاکستانی لشکر ءُ چیریں ادارھانی جوڑ کرتگیں کشندہ ٹولی ءِ نزیکیں کارمند امان اللہ ء ابدالھمید کشتگ ءُ آئی یک ھمبلے اُرش ءَ ٹپی بوتگ۔
آئی ءَ گوشتگ کہ دژمن ءِ کمکار امان اللہ 2011 ءَ زورگریں لشکر ءِ سروکی ءَ جوڑ بوتگیں کشندہ ٹولی ءِ بھر بوتگ ءُ ریاستی چاریگانی سروک راشد پٹان ءِ یک نزیکیں ھمبلے بوتگ۔ امان اللہ شے کھن ءُ گیبن ءَ پاکستانی لشکر ءِ ھمراھی ءَ گساں بیڑ برگ، ورنایانی زوریں بیگواہ کنگ ءُ نشانگ کنگ ءَ ھوار بوتگ۔ وھدے کہ ایشی جاہ ءَ زورگریں لشکر ءَ دزی، لٹ ءُ پل ءُ نشہ ءِ کاچاکی ءِ موکل داتگ۔
جارکش ءَ گوشتگ کہ دژمن ءِ کمکار امان اللہ ءَ کیچ ءِ ھند نودز ءَ وتی کارمندانی ھمراھی ءَ شھید جلال پنام بلوچ ءِ گس ءِ سر ءَ بیڑ برتگ چادر ءُ چار دیوالی لپاشتگ اَنت۔ چہ ایشی ابید ناسرآباد، شورما ءِ کوھاں لشکرکشیاں تچکی ءَ ھوار بوتگ۔ وھدے کہ امان اللہ ءِ کستریں برات شاھد وتی ھمبل نسار میران ءِ ھمراھی ءَ 2019 ءَ بی ایل اے ءِ سرمچارانی راہ ءِ بندگ ءِ جھد ءَ کشگ بوتگ۔
آئی ءَ گوشتگ کہ بی ایل اے ءِ سرمچاراں دگہ کاروائی یے ءَ مستونگ ءِ ھند چہ اسپلنجی مرو ءَ ملنگ ءَ مزنیں بنجل ءَ روکیں زورگریں پاکستانی لشکر ءِ یک چاریگے مجیب الرھمان ء ابدرھمان ءَ چار روچ پیش دزگیر کرتگ۔
جارکش ءَ گوشتگ کہ جست ءُ پرس ءِ میان ءَ مجیب الرھمان ءَ منّ اتگ کہ آ پہ پاکستانی لشکر ءُ ملٹری انٹلیجنس ( ایم آئی) ءَ دہ سال اِنت شال، اسپلنجی ءُ مرو ءَ چاریگی کنگ ءَ بوتگ۔ چاریگ ءَ دیمتر ءَ گوشتگ کہ شال ءَ روگ ءَ پد میر زیب کمبرانی ءِ پارست ءَ پہ پاکستانی لشکر ءِ پرمان ءَ چاریگی بندات کرتگ ءُ رند ءَ آسم کرد گیلو ءِ سروکی ءَ کار ءَ بوتگ۔
آئی ءَ گوشتگ کہ مجیب الرھمان ءَ منّ اتگ کہ آسم کرد گیلو ءِ گوشگ ءِ پد ءَ آ چہ شال ءَ سلمان کمبرانی ءُ گزین کمبرانی ءِ چاریگی کنگ ءَ پد پاکستانی چیریں ادارہ ءُ لشکر ءِ دست ءَ زور بیگواہ کنگ ءَ تچکی ءَ ھوار بوتگ۔
جارکش ءَ گوشتگ کہ یات بہ بہ اِت 8 جولائی 2015 ءَ پاکستانی لشکر ءَ کلی کمبرانی ءَ نودربر گزین کمبرانی ءُ سلمان کمبرانی زور بیگواہ کرتگ اَنت ءُ 14 اگست 2016 ءَ شال ءِ ھند ھزار گنجی ءَ یک دروگیں میڑے ءِ نام داتگ ءُ گزین کمبرانی، سلمان کمبرانی ءُ دگہ یک ورنایے ھمراھی ءَ شھید کنگ بوتگ، آ پچارگ نہ بوتگ۔
آئی ءَ گوشتگ کہ چاریگ مجیب الرھمان ءِ گوشگ اِنت کہ ھمے وریانانی شھیدی ءَ پد آ پہ اسپلنجی ءَ چاریگی ءَ دیم دیگ بوتگ۔ اود ءَ داں یک سالے ءُ نو ماہ ءَ بوتگ، چہ ایشی پد اسپلنجی ءِ ھند مَرو ءَ وتی دروشم مٹ کرتگ ءُ چاریگی ءِ کار کرتگ۔ آئی منّ اِتگ کہ ھمے میان ءَ گسانی سر ءَ بیڑ برگ ءُ مردمانی زوریں بیگواھی ءَ ھوار بوتگ۔
جارکش ءَ گوشتگ کہ اے دژمن ءِ کمکار ءِ سر ءَ راجی دروھی سرزد بوگ ءَ بلوچ آمیدگس ءَ مرگ ءِ سزا گوشتگ کہ ایشی سر ءَ سرمچاراں کار کرتگ ءُ گڈی آسر ءَ سر کرتگ۔
جیھند ءَ اے سے ئیں کارانی زمہ واری منّ اتگ ءُ گوشتگ کہ زورگریں لشکر ءُ آئی کمکار ءُ چاریگانی بگیری ءَ مئے کاروائی برجاہ بنت۔
بنشون: درشان / اکس: زرمبش
