بلوچ راجی راھشون ءُ بلوچستان آجوئی سنگر (بی ایل ایپ)سر کماش ڈاکٹر اللہ نزر ءَ گْوشتگ کہ ڈیرہ بگٹی ءَ پاکستانی لشکر ءِ لشکرکشی بلوچ راج ءِ بگیری ءَ چُکچینی ءِ بھر اِنت۔مرچی نہ تیوک ءَ ڈیرہ بگٹی بلکیں سرجمیں بلوچستان پاکستان ءِ زوراکی ءِ آماچ اِنت۔ پاکستانی لشکر ءُ گوں لشکر ءَ بندوکیں ادارہ گوں بلوچ ءِ ھوناں گْوازی کنگ ءَ اَنت۔کوھی دمگاں لکانی کَچ ءَ آبادیں بلوچ بہ بنت یاکہ کوچگ ءُ شھری دمگ مرچی دُرس پاکستانی لشکر ءِ رستری زوراکی ءُ چُکچینی ءِ آماچ اَنت۔
آئی ءَ گْوشتگ کہ بلوچ مرچی یک گْوستانکی دورے ءَ گْوزگ ءَ اِنت ءُ گوں پاکستان ءَ اے مئے گُڈّی جنگ اِنت۔ اے جنگ ءَ ھوار بیتگین ءُ اڈاند ودی کنوک دوئینانی کِرد شمشوشگ نہ بنت۔ھما بلوچ کہ پہ آجوئی ءَ وتی جان،مال ءُ سراں ندر کنگ ءَ اِنت گْوستانک ءِ تاکدیماں گوں شریں کِردے ءَ زندگ بنت،بلے ھما مردم، ٹولے یا گل کہ بلوچ راجی زْرمبشت ءِ بگیری ءَ دژمن ءِ ھمراہ اَنت، توری سیاسی بہ بنت یا چاریگ، باڑھی کُشندہ جوڑ بیتگ ءُ بلوچ ءِ چُکچینی ءَ ھوار اَنت، گْوستانک ایشاں جُست کنت۔
بلوچ راھشون ءَ گْوشتگ کہ بیست ءُ چار سال بیت کہ پاکستان بلوچ ءِ چُکچینی، زور بیگواھی، کُشت ءُ کوش، مال ءُ مڈیاں لُٹگ ءَ اِنت۔ پاکستان ھنچُش کہ وتی زوراکی ءَ گیش کنان اِنت، بلوچ سرمچار ھم دژمن ءِ سر ءَ مھروان نہ بنت۔ مرچی یک نیمگے دژمن ءُ دومی نیمگ ءَ بلوچ ءِ لھتیں ٹولی یا مردم گوں دژمن ءَ ھمراہ اَنت ءُ دژمن ءِ گون ءَ ھمدست اَنت۔من گوں تچکیں دانکاں گْوشاں کہ بلوچ وتی راجی دژمناں ھچبر پھل نہ کنت۔اگاں آیانی دستاں یا کہ دگہ سْوبے ءَ یک بلوچ پُسگے ءَ تاوان بوت گڑا آ پُسگ یک کھولے نہ اِنت بلکیں دُرسیں راج ءِ پُسگ اِنت ءُ اے تاوان دُرسیں راج ءِ تاوان زانگ بیت، ایشی ءِ ھون ءِ پھل کنگ یا زر زورگ ءَ آئی ءِ کھول ءَ ھم ھک نیست۔ دُرسیں راج سْوڑگ کنت کہ کشندہ پھل کنگ بہ بیت یاکہ سزا دیگ بہ بیت۔ منی ھیال ءَ داں مرچی بلوچ ءَ یک راجے ءِ بستار ھچ راجی دژمن پھل نہ کُتگ۔
ڈاکٹر اللہ نزر ءَ گْوشتگ کہ مرچی بلوچ ورنایانی دیمونی ءُ جُھد نہ تیوک ءَ پہ بلوچستان ءِ آجوئی ءَ بلکیں میان استمانی ھرچ ھما راج ءِ گون ءَ ھم پَتّی درشان کنت کہ آ پہ آجوئی، ھک ءُ مردمی ھکاں جُھد کنگ ءَ اَنت۔ اے ناگیگیں راجی جنگ ءَ اگاں ڈیھ، راج یا گل مئے کمک ءَ کنت ما آئی ءِ منت ءَ گریں بلے بلوچ راج جھان ءِ کمک ءَ ابید ھم وتی جُھد ءَ گوں سوبمندی ءَ برجاہ دار ایت۔ ما وتی دستانی ھاٹیگ ءِ سر ءَ دلجمیں چے ءَ کہ اے یک مردمے ءِ دست نہ اَنت بلکیں ایشانی پُشت ءَ کروڑاں بلوچانی پلہ مرزی ءُ کمک گون اِنت۔بلے جھان ءَ زانگ لوٹ ایت کہ زورگِری، ناشرکاری یا زور ءُ زوراکی ءِ بگیری ءَ جنگ ھچ ریاست ءِ وتی تھی جیڑہ نہ اِنت بلکیں اے دُرسیں جھان ءِ زمہ واری اِنت۔ ما اے زمہ واری ءَ پیلو کن ایں۔
