بلوچ آجوئی لوٹوکیں سروک رھیم ایڈوکیٹ ءَ ماں چاگردی رسانکدر ایکس ءَ وتی شنگ کرتگیں درشان ءَ گوشتگ کہ پشتون تھپز موومنٹ یک کسانیں وھدے ءَ نہ تیوک ءَ پہ پکتونانی ھک ءَ یک مھکمیں توارے بوتگ بلکیں آئی پکتونواہ ءِ ھدا دادیں مڈیانی لٹ ءُ پل ءَ ریاستی شوربندی ءُ ڈالری جنگ ءِ بگیری ءَ پکتون لس مردم شیوار کرتگ اَنت۔ آیان ءَ یکجاہ، مھکم ءُ ھوار کرتگ پنجاپی جرنیلانی دیم ءَ چو مھکمیں دیوال ءَ مک کرتگ اَنت۔
آئی ءَ گوشتگ کہ جی ایچ کیو ءِ شوندات ٹھینوک چہ بنداتی روچاں پی ٹی ایم ءَ پہ آزاردھی ءَ ھر پیمیں مکر ءُ ھیلہ سازگ ءُ چیڑینگ ءِ جھد ءَ کنگ ءَ اَنت دانکہ ارزانی ءَ پکتونانی اے راجمستری زرمبشت ءَ گوں ناشرکاری ءَ ھمگرنچ بہ کن اَنت ءُ آئی سر ءَ پابندی بہ جن اَنت، بلے پی ٹی ایم ءِ سروک، باسک ءُ کارکناں ریاست ءِ ھمک چیڑینگ ءِ پسو گوں ھمت ءُ راجمستری ءَ داتگ ریاست ءِ ھیلہ بے سوب کرتگ اَنت۔ پی ٹی ایم ءِ اوپار ءُ دوچاری ءَ ریاست گڈی ءَ پاشک کرتگ۔
رھیم ایڈوکیٹ ءَ گوشتگ کہ مرچی پنجاپی ناشرکار ءَ پی ٹی ایم ءِ سر ءَ پابندی جتگ ءُ آ ناشرکاریں گلانی لڑا ھوار کرتگ، بلے اے سوڑگ ءِ نیمون ءَ ریاست ءِ کِر ءَ ھچ وڑیں تچکیں یا انگتیں ویل ءِ منانک نیست۔ پی ٹی ایم ءَ پکتون دمگ ءَ ریاست پاکستان ءِ مکاریں میارباری شریں وڑے ءَ پاشک کرتگ اَنت۔ ریاست پاکستان ءِ نابزانتی اِنت کہ آئی تیوک ءَ یک نوٹیپکیشنے شنگ کرتگ ءُ پی ٹی ایم ناشرکار کرتگ 11 اکتوبر ءَ ”پشتون ادالت“ ءِ مچی ءَ دار ایت ءُ پکتونانی اے توانمندیں توار ءَ دار ایت۔ اے یک منگ بوتگیں راجی زرمبشتے ایشی بنیاد، رگ ءُ ریشگ گوں لس مردماں بندوک اَنت۔
راجدوستیں سروک ءَ گوشتگ کہ پنجاپی ناشرکار ءِ اے سوڑگ ءَ پہ پکتون لس مردماں ریاست پاکستان ءِ زورگری ھیال ءُ ابرم ءِ سرپد بوگ ارزاں کرتگ۔ نوں سادگ تبیں پشتون گوں ارزانی ءَ سرپد بنت کہ پاکستان ءِ تہ ءَ تیوک ءَ آیانی کالونی ءِ بستار اِنت۔ ھما وڑ ءَ انگریز ءَ پکتونان ءَ لشکر ءُ پرنٹیئر کور ءِ پارست ءَ پہ باڑھی کشندھی ءَ زرتگ ءُ آجوئی زرمبشت ءِ بگیری ءَ آیانی جنگی بودناکی کارمرز کرتگ اَنت ءُ وتی زورگری کسان بر ھِند ءَ برجاہ داشتگ، پنجاپی زورگر ءَ وتی واجھانی ھمے شوندات برجاہ داشتگ ءُ بلوچ آجوئی زرمبشت ءِ بگیری ءَ آیان ءَ ھمے مرسنری لشکر ءَ زرتگ ءُ کارمرز کرتگ اَنت، بلے پی ٹی ایم ءِ زرمبشت ءِ سوب ءَ پکتوناں پھم اِتگ کہ ریاست پاکستان ءَ پہ پنجاپیاں برابری ءُ شرپ تیوک ءَ یک دروگے۔
رھیم ایڈوکیٹ ءَ گوشتگ کہ نوں پشتون راج ءَ وتی راجی ھکانی پھریزگ، وتی سرڈگار ءُ مڈیانی سر ءَ واکداری ءُ راجی واک ءُ شرپ اے پنجاپی نوک آبادکاریں چہ ریاست ءَ آجوئی ءِ دروشم ءَ گندگ ءَ پیداک اِنت۔
