آواران: پاکستانی لشکر ءِ دست ءَ زور بیگواہ کنگ بوتگیں دلجان ءِ کھول ءِ نیمگ ءَ زھرشانی نندانک ءَ مرچی دو روچ اِنت کہ آواران دمگدار ءِ کارگس ءِ دیم ءِ برجاہ اِنت۔ زھرشانی ءَ نشتگیں مردم پہ پاد آھگ ءَ بیھار دیگ بوگ ءَ اَنت۔
زھرشانی نندانک ءَ اے وھد ءَ مردم بازیں کچے ءَنشتگ اَنت کہ آیانی جنین ءُ زھگ ھم ھوار اِنت۔ مرچی پد ا زور بیگواھیں دلجان ءِ کھول ءِ جار ءِ پد ءَ آواران ءَ تھتگ بند ھرتال کنگ بوتگ۔ دو روچ ءِ گوزگ ءَ پد ھم چہ واکدار ءِ نیمگ ءَ پہ آیانی لوٹانی منگ ءَ ھچ وڑیں گامگیج زورگ نہ بوتگ۔
زھرشانی ءَ نشتگیں مردمانی گوشگ اِنت دانکہ دلجان آجو کنگ نہ بوتگ ما وتی زھرشانی ننداننک ءَ برجاہ دار ایں۔
یات بہ بہ اِت کہ دلجان ء اللہ بکش ءَ پاکستانی لشکر ءَ ھمے سال ءِ 12 جون ءَ چہ آواران ءِ ھند تیرتیج ءَ آوار جتگ ءُ بیگواہ کرتگ انگت بیگواہ اِنت۔
