جنیوا۔ بلوچ راجی زرمبشت ( بی این ایم ) ءِ نیمگ ءَ پنچمی بلوچستاب میان استمانی کانپریس ءِ میان ءَ پیس پار ایشا ءِ جھگیر انھیلینا ءَ بلوچستان ءَ برجاھیں مردمی ھکانی لگتمالی ءِ ھلاس کنگ ءِ لوٹ ءِ سر ءَ زور داتگ۔
مرچی ما بلوچستان ءِ مردمانی دیم ءَ آتکگیں ریاستی زوراکی، زوریں بیگواھی ءُ لٹ ءُ پل ءِ نیمگ ءَ پہ دلگوش دیگ ءَ مچ بوتگ ایں۔ آ چہ ھدا دادیں مڈیا سریچیں دمگے بلے چہ وتی بنیادی ھکاں زبھر اِنت۔
آئی ءَ پیش داشتگ کہ ہ پنچ دھکاں سوئی گیس پیلڈز ءَ لٹ ءُ پل کنگ ءَ اَنت۔ لاھور ءُ اسلام آباد ءِ وڑیں شھر چہ اے مڈیاں نپ زورگ ءَ اَنت وھدے کہ سوئی ءِ ھندی آبادی چہ اے مڈیانی سر بوگ ءَ زبھر اَنت۔ اے بلوچانی گون ءَ پیش بیوکیں مالی ءُ ناھکیانی یک منانکے۔
انھیلینا ءَ چین پاکستان اکتسادی راھداری ( سی پیک ) ءِ سر ءَ تران کرتگ ءُ دیمتر ءَ گوشتگ کہ اے شوربندی چہ دیمروئی ءَ ابید زوراکی ءِ سوب جوڑ بوتگ۔ پہ سی پیک ءِ پھریزگ ءَ بلوچستان ءَ لشکری کارمندانی دیم دیگ، ڈگارانی دستیگ کنگ، لڈ ءُ بار، زوریں بیگواھی ءُ درکانودی کوش ءَ ھوار مردمی ھکانی لگتمالی گیش کنگ بوتگ اَنت۔
آئی ءَ چہ میان استمانی تک ءَ بلوچستان ءَ بیوکیں مردمی ھکانی لگتمالیانی پٹ ءُ پول کنگ ءِ سر ءَ زور داتگ ءُ کاروائی کنگ ءِ لوٹ کرتگ ءُ بلوچانی وتواکی ءِ ھک ءَ پلہ مرزی کرتگ ءُ آیانی توار ءِ گوش دارگ ءِ سدکی ءِ ازریشت دیم ءَ آوارتگ اَنت۔
وتی تران ءِ گڈی ءَ آئی ءَ گوشتگ کہ لُٹ ءُ پل ءُ چہ زوراکی ءَ بلوچ راجی آجوئی ءِ جھد مان نیارگ نہ بیت۔ اے مئے مچی زمہ واری اِنت کہ ما پہ بلوچستان ءِ انساپ، شرپ ءُ وتکواکی ءَ کار بہ کن ایں۔
کانپریس ءِ مول بلوچستان ءَ زوراکیانی باروا سرپدی دیگ ءُ میان استمانی تک ءَ بلوچانی ھکانی جھگیری بوتگ۔
