ھاران: زورگریں پاکستانی لشکر ءُ سی ٹی ڈی ءِ کارمندانی دست ءَ زور بیگواہ کنگ بوتگیں مردمانی کھولانی نیمگ ءَ مرچی پنچ روچ اِنت کہ ریڈ زون ءَ زھرشانی نندانک برجاہ اِنت۔
مرچی پنچمی روچ ءَ کھولانی نیمگ ءَ زھرشانی روانکے کشگ بوتگ روانک ءَ جنین ءُ زھگاں ھوار مردماں بازیں کچے ءَ بھر زرتگ۔ آیاں زوریں بیگواھیانی بگیری ءَ اوگام جتگ ءُ درسیں بیگواھیں مردمانی آجوئی ءِ لوٹ کرتگ۔
یات بہ بہ اِت کہ زور بیگواھیں مردمانی تہ ءَ چہ ھاران بازار ءَ زور بیگواہ کنگ بوتگیں امان اللہ مھمد ھسنی ءُ کلی جنگل رھمت اللہ ءَ امین اللہ، ارشاد اھمد، داؤد ءِ کھول زھرشانی ءَ ھاران ءِ ریڈ زون ءَ نشتگ اَنت۔
زور بیگواھیں مردمانی کھولانی گوشگ دانکہ مئے آزیز یل کنگ نہ بوتگ اَنت ما وتی زھرشانی نندانک ءَ برجاہ دار ایں۔
