ھاران: چہ کلی جنگل رھمت اللہ ءَ زورگریں پاکستانی لشکر ءِ دست ءَ بیگواہ کنگ بوتگیں مردمانی کھولاں زھرشانی ءَ ریڈ زون بند کرتگ۔
اھوالکار ءِ رد ءَ زوربیگواھیں امان اللہ ء ابدُالکادر، مھمد داؤد ء مھمد انور، ارشاد اھمد ء امین اللہ ءُ امین اللہ ء ابدُالکادر ءِ کھولاں آیانی زوربیگواھی ءِ بگیری ءَ زھرشانی ءَ ریڈ زون ءَ بند کرتگ۔
زھرشانی ءَ جنین ءُ زھگاں ھوار مردماں بازیں کچے ءَ بھر زرتگ ءُ نشتگ اَنت۔ زھرشانی کنوکیں مردماں زور بیگواھیں مردمانی اکس ھم گوں بوتگ اَنت۔
آیاں گوشتگ کہ بے میاریں مردمانی اے وڑ ءَ آوار جنگ ءُ بیگواہ کنگ درکانودی کارے ءُ گوں لس مردماں زوراکی یے زانگ بیت۔
آیانی گوشگ اِنت کہ امان اللہ مھمد ھسنی ھم بے میاریں مردمے پہ دو وھد ءِ نان ءَ مزدوری کنگ ءَ بوتگ کہ آ زور بیگواہ کنگ بوتگ۔
کھولاں گوشتگ کہ مھمد داؤد، امین اللہ، ارشاد اھمد ءُ امان اللہ ءِ سر ءَ چونیں ھم بھتامے ھست گڑا آمیدگس ءَ آرگ ءُ پیش کنگ بہ بنت۔ اگاں بے میار اَنت گڑا زوت یل کنگ بہ بنت۔
