روکپتی بلوچستان ءِ ھند شستون سراوان ءَ چہ لبزانکی ءُ ربیدگی گل آتار ءِ نیمگ ءَ بلوچی زبان ءِ جوانیں آشوبی شائر آبد راھشون ءِ اولی شائری کتاب ”گواڑگانی بچکند” ءِ دیمدرائی دیوان پنچ شمبے ءِ بیگاہ ءَ ماں لبزانکی ءُ ربیدگی گل آتار ءِ دیوانجاہ ءَ برجم دارگ بیتگ۔
دیوان ءَ بلوچی زبان ءِ شائر، نبشتہ کار ءُ کواساں بازیں کچے ءَ بھر زُرتگ ءُ وتی ھیال ءُ لیکہ درشان کُرتگ اَنت۔
دیوان ءِ گچینی مھمان گواڑگانی بچکند ءِ شائر آبد راھشون بیتگ،دیوان ءَ آبد راھشون ءِ کتاب ءِ دیمدرائی دیوان ءَ ھوار ماتی زبان ءِ بستار ءِ بابت ءَ ھم گپ ءُ تران بیتگ۔
دیوان ءِ جارچین سلال بلوچ بیتگ،ترانکاراں آبد راھشون ءَ مراد باتی داتگ ءُ دیوان ءِ بندات ءَ ھنیپ بلوچ ءَ تران کُرتگ ءُ آبد راھشون ءِ کتاب گواڑگانی بچکند ءُ بلوچی شائری ءِ سر ءَ گپ ءُ تران کُرتگ۔
شئیب ھمل ءَ آبد راھشون ءِ شائری ءِ سر ءَ پہ دلجمی گپ ءُ تران کُرتگ چہ آئی ءَ پد ڈاکٹر وارس دُرازھی ءَ آبد راھشون ءَ مراد باتی داتگ ءُ ماتی زبان ءِ بستار ءِ سر ءَ پہ دلجمی گُشتانک داتگ۔
بلوچی زبان ءِ کلانھیں نبشتہ کار ءُ ربیدگان شنگکاری ءِ سرکماش ماجد مساپر ءَ آبد ءِ شائری ءُ لبزانک ءِ سر ءَ گپ ءُ تران کُرتگ۔
بانُک سالھہ شھمیری ءَ بلوچی زبان ءِ سر ءَ وتی پٹ ءُ پولی نبشتانکے ونتگ ءُ بانک دھواری ءَ ماتی زبان ءِ بستار ءِ باروا پہ دلجمی گپ ءُ تران کُرتگ، بانک پرشتہ مُلازھی ءَ بلوچی بتل ءُ آیانی بزانت ونتگ اَنت۔جاسم جام دوست ءَ بلوچی زبان ءِ باروا وتی پٹ ءُ پولی نبشتانکے ونتگ ءُ واجہ منیر الھک سئیدی ءَ ھم وتی پٹ ءُ پولی نبشتانکے دیوان ءَ ندر کُرتگ۔
دیوان ءِ آدگہ بھر شائری بیتگ کہ واجہ جُما جدگال، آرپ تھنا،شئیب ھمل، آبد راھشون ءُ ھنیپ بلوچ ءَ وتی شیئر ونتگ ءُ دیوان وشنود کُرتگ۔
گُڈی ءَ دیوان ءِ جارچین سلال بلوچ ءَ دیوان ءَ اتکگیں مھمانانی منت گِپتگ ءُ دیوان ءِ آسری ءِ جار جتگ۔
