بلوچ یکجھتی کمیٹی ءِ جارکش ءَ گوشتگ کہ ریاست پاکستان ءَ بلوچستان ءَ سدانی کچ ءَ مردمانی نام پورتھ شیڈول ءَ ھوار کرتگ اَنت اے درسیں مردمانی زندگی پھریز نہ اِنت۔ پورتھ شیڈول ءَ ھواریں مردمانی تہ ءَ پروپیسر، ٹیچرز، لبزانکار، ڈاکٹر، اھوالکار، سیاسی ءُ مردمی ھکانی کارکناں ھوار سرجمیں بلوچستان ءَ سدانی کچ ءَ مردم ھوار کنگ بوتگ اَنت۔ آیاں ریاستی چیریں ادارھانی کارمند ءُ سی ٹی ڈی ءِ نام ءَ رھوت کنگ ءُ چیریں ادارھانی کارگساں پہ روگ ءَ لاچار کنگ ءَ اَنت۔ وھدیکہ ریاست پاکستان سدانی کچ ءَ پروپیسر، ٹیچر، لبزانکار، ڈاکٹر، اھوالکار، سیاسی، چاگری ءُ مردمی ھکانی کارکناں گوں سلاہ بندیں گلاں ھمگرنچ کنگ ءُ آیانی ناماں پورتھ شیڈول ءَ ھوار کنگ ءُ آیانی کھولاں سسائی آزارانی نشانگ کنگ ءَ اِنت۔
آئی ءَ گوشتگ کہ ما سرپد بہ ایں کہ ریاست بلوچستان ءَ زوریں بیگواھی، درکانودی کوش ءُ لشکری زوراکیانی ھواری ءَ مردماں ترس آماچ کنگ ءُ آیاں یکشل ءَ پہ سسائی آزار دیگ ءَ پورتھ شیڈول ءِ وڑیں پندلے کارمرز کنگ ءَ اِنت۔ پورتھ شیڈول ءِ وڑیں آزاردھیں ریاستی زوراکیانی مول سرجمیں بلوچستان ءَ یک انچیں گروداری بنجلے ءَ گوں مٹ کنگ اِنت۔ اودد ءَ مردم چہ ریاست ءِ منشا ءَ ابید ساہ کش اِت مہ کن اَنت۔ ریاست پاکستان ءَ بلوچستان ءَ وتی نوکیں شوربندی ءِ پیلو کنگ ءَ کانود ءُ وتگڑیں سوباھی اسمبلی ءِ کمک ءَ وتی درسیں آزاردہ ءُ رستری شوربندیاں کانودی دروشمے دیگ ءَ اِنت۔ ایشی انوں منانک پورتھ شیڈول ءَ سدانی کچ ءَ مردمانی نام ءِ ھوار کنگ اِنت۔
جارکش ءَ گوشتگ کہ ما یاست ءُ آئی درسیں ادارھاں تچکی ءَ گوش ایں کہ ما بلوچستان ءَ ریاستی زوراکیانی بگیری ءَ لسمردمی گھگیری کن ایں ءُ مردمانی زور ءِ پارست ءَ بلوچستان ءَ ریاست ءِ اے وڑیں درسیں مردم کشیں شوربندی ءُ شونداتاں بے سوب کن ایں۔ وھدیکہ ما مردمی ھکانی ادارھانی گون ءَ لوٹ کن ایں کہ آ بلوچستان ءَ ریاست ءِ نوکیں آزاردھیں شوندات ءُ مردمی ھکانی پادمالیانی بارو زوت دلگوش ءَ گور بہ کن اَنت۔
