بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشابے ءَ گوشتگ کہ سرمچاراں کیچ ءُ پنجگور ءَ دو جتائیں اُرشاں زورگریں لشکر ءُ پولیس لشکر نشانگ کرتگ اَنت۔
آئی ءَ گوشتگ کہ 9 ستمبر ءِ شپ ءَ ھشت ءُ نیم ءِ نزیک ءَ سرمچاراں کیچ ءِ ھند گورکوپ ءَ زورگریں لشکر ءِ مزنیں بنجل ءِ سر ءَ باز اے ون ءِ گولا آس داتگ کہ بنجل ءِ تہ ءَ کپتگ اَنت۔ ایشی پد سرمچاراں گوں نوک ءُ مزنیں سلاھاں بنجل نشانگ کرتگ چہ ایشی ءَ دژمنیں لشکر ءَ بازیں کچے ءَ جانی ءُ مالی تاوان بوتگ۔
جارکش ءَ گوشتگ کہ دگہ یک اُرشے ءَ پنجگور چتکان ءَ سرمچاراں 8 ستمبر یک شمبے ءِ روچ ءَ پولیس ءِ گاڑی ءِ سر ءَ اُرش کرتگ، ایشی زد ءَ آھگ ءَ پولیس انسپکٹر شکیل اھمد مرتگ۔
آئی گوشتگ کہ بلوچستان بلوچ راج ءِ سرڈگار اِنت ءُ سرڈگار ءِ ھکی ئیں پسگاں سرڈگار ءِ سر ءَ پاکستانی زورگپتی ءِ بگیری ءَ سلاہ بندیں گھگیری ءِ پارست ءَ پاکستانی لشکر گوں زھنی، جانی ءُ سسائی پروش ءَ دیم پہ دیم کرتگ۔ چہ ایشی سوب ءَ پروش وارتگیں لشکر لس آبادی ءُ کودکیں مردماں نشانگ کنت۔
جارکش ءَ گوشتگ کی پولیس ءَ کڈن کن ایں کہ آ سرمچارانی رندگیری کنگ ءَ یل بہ کنت اگاں نہ آسر ئِے دژمنیں لشکر ءِ وڑ ءَ بیت۔
میجر گھرام ءَ اُرشانی زمہ واری منّ اتگ ءُ گوشتگ کہ داں بلوچستان ءِ آجوئی ءَ اُرش کنگ ءِ کول ءَ کن ایں۔
