ایردستی ءِ چیدگ چاردہ اگست چہ گوستانک ءِ لڑ ا لبز دور کنگ ءُ ایردستیں راج آجو بنت۔
زوگریں پاکستان ءِ جوڑ بوگ ءِروچ ءِ درگت ءَ بلوچ راجی زرمبشت ( بی این ایم ) ءِ جارکش ءَ وتی درشان ءَ گوشتگ کہ چاردہ اگست بندوبست پہ ایردستیں اراجاں سیاھیں روچے۔ چہ مرچی ءَ ھپتادءُ ھپت سال پیش کالونیل توانمند اں پہ وتی نپاں اے ڈیھ جوڑ کرتگ مرچی اے پہ جھان ءِ ایمن ءُ سلامتی ءُ مردمگری ءَ مزنیں ترسے ودی بوتگ۔
آئی ءَ گوشتگ کہ بندوبست پاکستان ءِ مرچی بلوچ، پشتون، سندی، کشمیری ءُ پہ گلگت بلتستان ءِ مردماں ھچ پیمیں وشی ءِ گپے نہ اِنت، بلکیں گم ءُ پرس ءِ چاگرد اِنت۔ وشی تیوک ءَ پہ پنجاپ ءَ اِنت آئی ایردستیں راجانی آجوئی پج گپتگ ءُ آدگہ راج گوں اے وتگڑیں ” آجوئی شاتکامی” ءَھمگرنچ نہ اَنت۔ پمیشکا کہ آ پاکستان ءَ آجو نہ اَنت بلکیں ایردستی ءِزندگی گوازینگ ءَ اَنت۔
آئی ءَ گوشتگ کہ بلوچستان ءَ پاکستانی لشکر ھمک سال چاردہ اگست ءَ لب ءُ ترس کارمرز کنت پد ءَ ھم وتگڑیں شاتکامی ءِ دیوان سوبین نہ بنت۔ بلوچ بیزای ءُ کینگ ءَ پیش دار اَنت۔
گوستگیں ھپتاد ءُ ھپت سال اِنت چوشیں یک روچے نہ گوستگ کہ پاکستان سرکار ءَ زوراکی شوندات ھلاس کرتگ۔ پہ بلوچانی مڈیانی لٹ ءُ پل کنگ ءَ بلوچ چہ راجی واک ءَزبھر کرتگ اَنت بلوچ سرڈگارتچکی ءَ پاکستانی لشکر ءِ دست ءَ اِنت۔ درسرکاری واک تیوک ءَ لشکر ءِ کمکاری ءِ کرد ءَ پیلو کنگ ءَ اَنت ءُ جھگیری ءِ نام ءِ سر ءَ بلوچستان ءِ وتگڑیں اسمبلی ءَ لشکر ءِ کمکارنشتگ اَنت کہ آ لشکر ءِ پرمان ءِ سر ءَ ھما وڑ کار کن اَنت۔ اے سالانی میان ءَ ھزارانی کچ ءَ بلوچ زور بیگواہ ءُ کشگ بوتگ اَنت۔ بلوچ ھمک روچ لاش چست کنگ ءَ اِنت۔ پاکستانی لشکر ریاست ءِتوان ءُ زوراکی ءِ زور ءِ سر ءَ زورگپت اِنت ءُ بلوچ راجی وتی راجی توان ءِ پارست ءَ شریں وڑے ءَ گھگیری کنگ ءَ اِنت۔
بی این ایم ءِجارکش ءَ گوشتگ کہ بلوچ راج گوں سبر ءُ مھکمی ءَ اوشتاتگ۔ ما ھمک دمان ءَ پہ راجی آجوئی جھد ءِ سوبمندی ءَ بہ جیڑ ایں آ روچ الم کیت کہ ایردستی ءِ چیدگ چاردہ اگست گوستانک ءِ لڑا لبز دور بیت ءُ ایردستیں راج وتی ڈیھاں شرپ ءِ زندمانے گوازین اَنت۔
