بلوچ یکجھتی کمیٹی ءِ جارکشءَ گوشتگ کہ زی اوتل زیرپوائنٹ ءَ گوادر ءَ روکیں ھندی مردمانی واکدار ءِنیمگ ءَ دارگ ءُ موکل گرگ ءِ پرمان دیگ بلوچستان ءِ کالونیل بستار ءَ پدر کنت۔ ریاست ءُ آئی درسیں ادارہ ھمک روچ ھمک گوں یک گامگیجے ءَ ھندی مردمانی سر ءَ تچک کنگ ءَ اِنت کہ بلوچستان ءُ آئی بستار سیمی بھرگ ءِ شھری یا ایردستی ءِ پیم ءَ اِنت۔ اے ریاست ءِ راھبند ءِ کجام شک ءَ نبشتگ کہ ھندی مردماں گس ءَ روگ ءَ موکل گرگ لوٹ ایت؟ بلوچان ءَ پیسر ءَ وتی سرڈگار ءِ سر ءَ سیاسی مچی دارگ ءِ موکل نیست، گپ کنگ ءِ آجوئی نیست، پریس کلب کبل کنگ بنت، رسانکدر ءِ سر ءَ پابندی اِنت، کانود ءِ جنگ ءَ مڑگ ءِ موکل نیست اَت۔ نوں بلوچان ءَ پہ وتی گس ءَ روگ ءَ چہ واکدار ءَ موکل گرگ لوٹ ایت۔ اے وڑیں کانود بلوچستان ءَ برٹش کالونیل ءِ زمانگ ءَ نہ بوتگ۔ ما سرپد بہ ایں کہ بلوچ چہ وتی سرڈگار ءِ سر ءَ سرجم ءَ کشگ بنت، پمیشکا زوراکی ءِ درسیں سیمسر گواز کنگ بوگ ءَ اَنت۔
درشان ءَگوشگ بوتگ کہ ریاست اے کالونیل نزامءُ کانود ءِ بگیری بلوچ راج ءِ کر ءَ نوں چہ یک مھمکیں جھدے ءَ ابید دگہ ھچ راہ نیست۔ اگاں اے زوراکیں نزام ءِ بگیری ءَ ما بے توار بوت ایں یا کسان کسانیں ٹولیانی دروشم ءَ جھد کرتگ گڑا چہ اے سرڈگار ءَ مئے نام ءُ نشان گار بیت۔ مئے راجی پدریچ ءِ سلامتی تیوک ءَ گوں ھم پتی ءُ مھکمیں جھد ءَ اِنت۔اے ریاست ءَ درساں گیش بلوچ راج ءِ یکجاھی تور ایت۔ ایشی منانک راجی مچی اِنت۔
آئی ءَ گوشتگ کہ اے راجی مچی ءِ وڑ ءَ بلوچ راج ءَ ھم پتی ءُ یکجاھی پیش داشتگ، چہ ایشی ریاست بلوچستان ءَ وتی زوراکیانی نزام ءِ برجاہ دارگ ءِ باروا ترس مار اتگ۔ ما گندگ ءَ ایں کہ یک راجی سیاسی مچی یے ءِ دارگ ءَ انچو زور اکی آزاردھی ءُ زور کارمرز کرتگ، بلکیں ریاست وتی سرجمیں گوستانک ءَ یک سیاسی مچی ءِ دارگ ءَ انچو زور نہ چکاس اَتگ۔ مئے نہ ترس ءُ باسمائیں ورنایانی دیمونیاں راجی پارست ءَ زانتءُ سرپدی ودی کرتگ ھمیشی برورد اِنت کہ بلوچ ءِ بستا ر آھوکیں روچاں مارا گندگ بوگ ءَ اِنت۔ مارا ھمے شھیدانی دیمونی چارگ ءُ وتی تہ ءَ ھم پتی ءُ یکجاھی ودی کنگ لوٹ ایت ءُ اے جھد گیشتر مھکم ءُ تیز کنگ لوٹ ایت۔
