شال: زور بیگواھیں جیھند ءِ لوگبانک رزوانہ ءَ گوں کھول ءِ آدگہ مردمانی ھواری ءَ شال پریس کلب ءَ پریس کانپرس کرتگ ءُ گوشتگ کہ 26 جولائی ءِ شپ ءَ اسپنی دگ شال ءَ بلوچ نودربر گل ءِ بنجاھی سرکماش جیھندءُکمک سرکماش شیر باز ءَ گوں دگہ لھتیں ھمبلانی ھمراھی ءَ پولیس ءُ سادگ پوشاکیں مردماں آوار جتگ ءُ کائد آباد پولیس گس ءَ برتگ اَنت۔ دومی روچ ءَ چہ آدگہ ھمبلاں لھتے یل کنگ بوتگءُ لھتیں زندانی کنگ بوتگ۔ بلے جیھند ءُ شیرباز چیریں جاھے ءَ برگ بوتگ اَنت کہ آیانی باروا انگت ءَ ھچ وڑیں ھال نیست۔
آئی ءَ گوشتگ کہ بلوچ چاگرد ءَ بی ایس او، بلوچ نودربر ءُ پہ ورنایاں سیاسی ءُ چاگردی زانشت ءَ درسگاہ ءِ ارزیشت ءَ دار ایت کہ گوستانکی پارست ءَ بلوچ نودربر ھواریں جیڑہ ءُ ایردستی ءِ بگیری ءَ راجمستری ءُ پہ دیمروئی دوستیں راھبندانی سر ءَ برجاھیں جھگیریں گلے بوتگ۔ بلے بدبھتی ءَ گوستگیں چنچو سال اِنت کہ بلوچ چاگرد ءِ سر ءَ زوراکیانی برجاھیں شونداتانی رد ءَ ھرپیمیں سیاسی ءُ راجمستری جھد ءِ سر ءَ پابندی جنگ بوتگ۔ پہ ھک ءِ گپ جنگ ءَ یا زھرشانیانی سر ءَ تیرگواری کنگ بیتءُ ورنا زور بیگواہ کنگ ءُ آیانی سر ءَ دروگیں کیس جنگ زوراکیانی بگیری ءَ پہ بے توار کنگ ءَ جھد کنگ بیت۔ ما سرپد ایں جیھند ءُ شیرباز ءَ ھوار ھزارانی کچ ءَ ورنا زوراکیانی بگیری ءَ توار چست کنگ ءِ بنیاد ءَ زور بیگواہ کنگ بوتگ اَنت۔
آئی ءَ گوشتگ کہ گوستگیں چنچو سال اِنت مئے کھول یکشل ءَ زوریں بیگواھی ءُ دروگیں کیسانی دیم پہ دیم اِنت۔ 29 جنوری 2018 ءَ شپ ءِ نیم ءَ چہ مئے گس ءَ پاکستانی لشکر ءَ جیھند آئی پت ءُ کستریں برات ھسنین آوار جتگ ءُ بیگواہ کرتگ اَنت۔ جیھندداں ھست ماہ ءَ بے میار ءَ بند کنگ بوتگ ، کسان امریں ھسنین ءِ سر ءَ دروگیں کیس جنگ ءُ کراچی بندیگجاہ ءَ برگ بوتگ انگت ءَ بندیگ اِنت۔ چہ اے ویلاں کھول یکشل ءَ سسائی آزارانی دیمپان اِنت کہ اے انگت ءَ برجاہ اَنت۔ مامئے کھول ءِ سر ءَبرجاھیں اے زوراکیانی ھلاسی ءُانساپ ءِ لوٹ ءَ کن ایں۔
آئی ءَ گوشتگ : یات بہ بہ اِت کہ 28 جولائی ءَ گوادر ءَ بیوکیں راجی مچی ءِ بگیری ءَ سرکار ءِ ارش ءِ سوب ءَ شال ءُ چہ سرجمیں بلوچستان ءَ سدانی کچ ءَ ورنا دزگیر کنگ بوتگ کہ آیانی تہ ءَجیھند ءُ شیرباز ھوار اَنت، آ نہ آمیدگس ءَ پیش کنگ بوتگ اَنت ءُ نہ آ زنداناں برگ بوتگ اَنت۔ چہ پولیس گساں ورنایانی بیگواہ بوگ پہ کھول ءَ بژنی گپے ءُ پہ مردمانی پھازداری ءَ برجاھیں ریاستی ادارھاں جستے ودی کنت۔
آئی ءَ گوشتگ کہ ما اے پریس کانپریس ءِ پارست ءَ ریاستی ادارھاں ھمے کلوہ ءَ دیگ لوٹ ایں کہ جیھند ءُ شیرباز زمہ واریں سیاسی کارکن اَنت، اگاں آیانی سر ءَ چونیں میارے سرزد بوتگ گڑا آیاں پہ شرپ آجو بہ کن ءُ ریاستی آمیدگس ءَ پیش کنگ بہ بنت۔ چو آدگرانی وڑ ءَ مئے کھول بے میاریں ورنایانی درکانودی آزار جاھاں بند کنگ ءَ ھچ وڑ ءَ اوپار کرت نہ کنت۔ اگاں جیھند ءُ شیرباز داں یازدہ اگست ءَ آجو نہ بوت اَنت کھول داوزدہ اگست ءَ ھدہ منوجان دگ ءَ ایمنیں روانکے کش ایت۔ ما گوں درسیں دیمروئی دوستیں سیاسی، چاگردی بھرگانی گون ءَ لوٹ کن ایں کہ پہ جیھند ءُ شیرباز ءِ آجوئی ءَ مئے گون ءَ کمک بہ کن اَنت ءُ روانک ءَ ھوار رسانکدر ءَ کمیپین ءَ بھر بزور اَنت۔
