بلوچ یکجھتی کمیٹی ءِ سروک ڈاکٹر ماہ رنگ ءَ ماں رسانکدر ءَ وتی شنگ کرتگیں درشانے ءَ گوشتگ کہ جیھند ءُ شیرباز ءَ ھوار اے وھد ءَ مئے بازیں ھمبل زور بیگواہ اَنت ءُ سدانی کچ ءَ بلوچستان ءِ جتائیں زنداناں بندیگ اَنت۔
آئی ءَ گوشتگ کہ مرچی گوادر نندانک ءَ یازدہ روچ سرجم بوتگ، ما پہ انساپ ءِ لوٹ ءَ گوستگیں یازدہ روچ اِنت نندانک ءَ نشتگ ایں۔ بلے ریاست نندانک ءِ راھبند ءُ کانودی لوٹانی منگ ءَ ابید گوادر ءَ ھوار سرجمیں مکران ءَ بند آرگ جنگ بوتگ۔ گوستگیں روچاں چہ نیٹورک ءُ دامگ ءِ بند بوگ ءِ ھواری ءَ گوادر ءُ تربت ءِ زمینی ءِ راہ بند کنگ بوتگ اَنت۔ ایشی سوب ءَ اد ءَ وردن ءُ درمان ءِ نیستی روچ پہ روچ گیش بوگ ءَ اِنت۔ اے بند آرگ ءِجاوراں ماھیگیر ءُ مزدور سکا سانمند اَنت ایشانی زورگار ءِ درسیں بنشون بند کنگ بوتگ اَنت۔ گوادر ءِ مردمانی زندمان جنجالانی دیمپان اِنت، بلے ریاست چہ وتی رستری ءُ ناشرکاریانی ھلاس کنگ ءَ ھچ وڑ ءَ جاڑیگ نہ اِنت۔
ڈاکٹرماہ رگوشتگ کہ من بلوچ ءُ میان استمانی جھان ءِ گون ءَ لوٹ کن آں کہ پہ مئے دزگیریں ھمبل ءُ گوادر ءَ برجاھیں ریاستی زوراکیانی بگیری ءَ توار چست بہ کن اَنت۔ بلوچستان ءَ برجاھیں ریاستی زوراکیانی بگیری ءَ شما چنچو توار چست کرت کن اِت بہ کن اِت۔ اے وھد ءِ بے تواری مئے مچی مرگ ءُ یک ناھکیں مردمی تباھی یے ودی کنت۔
