بلوچ راجی زرمبشت ( بی این ایم ) یو کے چیپٹر ءِ نیمگ ءَ لندن ءِ شھر ٹریپلگر اسکوائر ءَ زھرشانی روانکے کشگ بوتگ۔ زھرشانی روانک ءَ بی این ایم یو کے چیپٹر ءِ کارکن، سندی ءُ بلوچاں ھوار جنین ءُ زھگاں سدانی کچ ءَ بھر زرتگ۔ زھرشانی روانک چہ ٹریپلگر اسکوائر ءَ در آتکگ ءُ جتائیں شھدگاں تر ءُ گرد کنگ ءَ پد کامن ویلتھ کارگس ءِ دیم ءَ مچ بوتگ اَنت۔
زھرشانی مول پاکستانی لشکر ءِ نیمگ ءَ بلوچ یکجھتی کمیٹی ءِ چیر دستی ءَ بلوچ راجی مچی ءِ میان ءَ ناھکیں آزاردھی، ھمے میان ءَ گوادر، مستونگ ءُ نوشکے ءَ بیوکیں زوراکی کاروائی چہ ایشی ءَ سے زھرشانی کنوکانی کشگ، درزنانی کچ ءَ ٹپی بوگ، سدانی کچ ءَ بی وائی سی ءِ باسکانی زوریں بیگواھی ءُ گوادر ءَ بند آرگ ءَ ھوار شھدگانی بند کنگ ءِ بگیری ءَ توار چست کنگ بوتگ۔
زھرشانی ءِ میان ءَ زھرشانی کنوکاں گوادر ءِ انگر ءِ ھلاسی ءُ ریاستی ناشرکاری ءِ سانمندیں مردمانی گون ءَ انساپ کنگ ءِ لوٹ کرتگ۔ زھرشانی روانک ءَ ھواریں مردماں پلے کارڈ ءُ بینر گوں بوتگ اَنت کہ آیانی سر ءَ پاکستانی لشکر ءِ زوراکیانی بگیری ءُ راجی مچی ءِ ھک ءَ اوگام جتگ۔
اے میان ءَ زھرشانی کنوکیں مردمانی گوشگ اِنت کہ میان استمان ءَ بلوچستان ءَ برجاھیں مردمی ھکانی بگیری ءَدلگوش دیگ لوٹ ایت۔
روانک ءَ ھواریں مردماں تران کرتگ ءُ گوشتگ کہ پاکستانی لشکر گوادر، مستونگ ءُ نوشکے ءَ ایمن ءُ کودکیں مردمانی سر ءَ زوراکی کنگ ءَ اِنت اے اوپار کنگ نہ بیت۔ گوادر ءِ بند آرگ زوت ھلاس کنگ بہ بیت چوش مہ بیت کہ دگہ مردمگری ءِ ٹوھیں ویلے ودی بہ بیت۔
زھرشانی ءَ بی این ایم ءِ کستریں کمک سرکارگشاد ھسن دوست ءَ تران کرتگ ءُ گوشتگ کہ گوادر ءَ ھوار سرجمیں بلوچستان ءَ پاکستانی لشکر ءِ نیمگ ءَ برجاھیں ارش ءُ گوادر ءِ انگر ءَ ایر جن ایں۔ آئی ءَ گوں میان استمانی ءُ مردنی ھکانی میان استمانی ادارھاں لوٹ کرتگ کہ آ بلوچستان ءَ رستری زوراکیانی باروا دلگوش بہ دے اَنت ءُ پاکستان ءَ جست بہ کن اَنت۔ دامگ ءُ دگانی بند کنگ ریاست ءِ وتسری لیک اِتگءُ گوشتگ کہ چہ اے وڑیں کارپداں ریاست وتی زوراکیاں چیر دات نہ کنت۔
بی این ایم یوکے چیپٹر ءِ سرکماش منزور ءَ زھرشانی ءَ وتی ترانانی تہ ءَ بلوچ جنینانی سروکی کرد ءُ پہ راجی ھکاں جھد ساڑاتگ ءُ گوشتگ کہ اے مئے وش بھتی اِنت کہ بلوچ مات ءُ گھار مرچی جنگ آماچیں بلوچستان ءَ گوں نہ ترسی ءَ گوں وتی براتاں ھمگام اَنت۔
آئی ءَ گوشتگ کہ اے دمگ ءَ بلوچ جنینانی سیاسی زانشت ءُ جھد پہ نزوریں راجاں مادنیں راہ اَنت۔
جنینیں کارکن گل رئیسانی ءَ زھرشانی ءَ تران کرتگءُ گوشتگ کہ مرچی ما اد ءَ پمیشکا یکجاہ بوتگ ایں دانکہ بلوچ راجی مچی ءُ ھمے مچی ءِ میان ءَ ریاستی لشکر ءِ زوراکیانی آماچیں گوں مردماں یکجھتی بہ کن ایںءُ شرپمندیں جھان ءَ ھمے پیش بدار ایں کہ بلوچ پہ وتی زمین ءُ راجی جھد ءَ دزکش نہ اِنت ءُ نہ سی پیک ءِ وڑیں لٹ ءُ پلی شوربندیاں من ایت۔ گل رئیسانی ءَ گوادر ءَ بند ارگ، دامگ ءُ ورگی سامانی دارگ ریاست ءِ ترس لیک اِتگءُ گوشتگ کہ چہ اے وڑیں زوراکیاں مردمانی زبان بند نہ بیت۔
کائنات بلوچ ءَ روانک ءِ زھرشانی کنوکانی گون ءَ تران کرتگ ءُ بلوچ راجی مچی ءَ بلوچ جنینانی بھر زورگ ءَ گوستانی کارے لیک اتگ ءُ گوشتگ کہ بلوچ جنین مرچی اے جاہ ءَ سراَنت اے درسیں جھدکارانی دیمونی ءِ برورد اِنت کہ آیاں بے دروریں دیمونی داتگ ءُ اے جھد ءَ بلوچ جنینانی سر ءَبیسہ کرتگ ءُ آیان ءَ اے زرمبشت ءِ بھر جوڑ کرتگ۔ اے وھد بے تواری ءِ نہ اِنت بلکیں گوں وتی براتاں ھوار اوشتگ ءُ جھد کنگ ءِ اِنت۔
