وائس پار مسنگ پرسن آپ سند ءِ سروک سورٹ لوھار ءَپاکستان سرکار ءِ نیمگ ءَ چہ باز سالاں زور بیگواہ کنگ بوتگیں مردمانی ھمک کھول ءَ پنجاہ لک زر دیگ ءِ گپ رد کرتگ ءُ گوں ترندی ءَ گوشتگ کہ ما مئے درسیں بیگواھیں سندی راجدوستیں کارکنانی جھد پہ وتی وتن سند ءِ آجوئی ءَ اِنت ءُ چہ وتی وتن ءَ مھر ءُ جھد کنگ ءِ میار ءَ پاکستان ریاست ءُ آئی لشکرءُ چیریں ادارھانی دست ءَ آوار جنگ بوتگ اَنت ءُ چنچو سال اِنت کہ آ پاکستانی لشکر ءِ بنجلانی تہ ءَزندگیں لاشانی وڑ ءَ درد سگگ ءَ اَنت، آ تھنا پہ وتی سندی راج ءُ سندھو دیش ءَاوپار کنگ ءَ اَنت۔ پہ اے سرڈگار ءَ مئے مستریں مردماں گوستگیں چنچو دھک اِنت کہ وتی جانانی دیمونی داتگ ءُ ھونریتکگ اَنت ءُ مئے ھزرانی کچ ءَ راجی کارکناں بے کساس دیمونی داتگ۔
آئی ءَ گوشتگ کہ پاکستان ریاست مئے ھمے دیمونی ءُ آزاراں لھتیں چاریگانی پارست ءَ بھا زورگ لوٹ ایت۔ مئے جھد پہ وتی وتن ءِ آجوئی ءَ اِنت۔ پمیشکا پاکستان ریاست ءِ اے وڑیں لب دیگ ءِ جار ءَ سرجم ءَ رد کن ایں۔
سورٹ لوھار ءَگوشتگ کہ ما گوں اکوام متھدہ، ایمنسٹی انٹر نیشنل، ایشن ھیومن رائیٹس کمیشن، ریڈ کراس، ھیومن رائیٹس واچ ، یورپی یونین،یو این پی ءُ انٹر نیشنل کورٹس آپ جسٹس ءَ ھوار گوں جھان ءِ درسیں مردمی ھکانی ادارھان لوٹ کن ایں کہ آ پاکستان ریاست ءِ سر ءَ وتی ھر پیمیں سیاسی، مالی ءُ سپارتی زور ءَ بدے اَنت کہ پاکستان ریاست سرجمیں سند ءِ چہ بازیں سالاں پاکستانی چیریں ادارھانی دست ءَ زور بیگواہ کنگ بوتگیں مئے راجدوستین سروک ایوب کاندھڑو، مرتزا جونیجو، انساپ دایو، سرویچ نوھانی، پھٹان ھان زھرانی، زپر چانڈیو، اجاز گاھو، کاشپ ٹگڑ، سھیل رزا بھٹی، موھن میگھواڑ، شبیر کمبرانی، ڈاکٹر پتہ مھمد کوسہ، اللہ ودھایو مھر، ابید مینک، جاویدسنگھار، ساجن ملوکانی ءُیوسپ شر ءَ ھوار درسیں سندی کارکناں آجو بہ کنت۔
آئی ءِ جارجتگ ءُ گوشتگ کہ ما پہ وتی آزیزانی زوریں بیگواھی ءِ سوب ءَ پاکستان ءِ جوڑ بیوکیں روچ 14 اگست ءَ پہ سند راج ءَ سیاھیں روچے ءِ دارگ ءِ جار ءَجن ایں ءُ 30 اگست ءَ زوریں بیگواھیانی میان استمانی روچ ءَ کراچی ءَ سندھی، بلوچ ءُ پہ درسیں بیگواھیانی مردمانی آجوئی ءَ یک مزنیں زھرشانی یے ءِ جار ءَ جن ایں۔
