بلوچستان آجوئی سنگر ( بی ایل ایپ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ زامران ءُ پنجگور ءَ سے جتائیں کاراں کشندہ ٹولی، لشکر ءِ راشن ءُ ٹاور نشانگ کُتگ اَنت۔
آئی ءَ گوشتگ کہ مرچی سُھب ءَ ناگ زامران ءَ سرمچاراں راہ بستگ ءُ زورگریں پاکستانی لشکر ءِ راشن بروکیں گاڑی راشناں ھوار دستیگ کُرتگ ءُ ڈرائیور بلوچ بیگ ءِ بنیاد ءَ یل داتگ۔
جارکش ءَ گوشتگ کہ یک کارے ءَ سرمچاراں دوشی شپ ءِ ھشت ءُ نیم ءَ ڈمبان زامران ءَ زورگریں پاکستانی لشکر ءِ دامگ سرویس دیگ ءَ بیتگیں ٹاور نشانگ کُرتگ ءُ تباہ کُرتگ۔
آئی ءَ گوشتگ کہ دگہ یک کارے سرمچاراں 26 جولائی ءِ شپ ءِ ھشت ءَ پنجگور شھر ءَ چتکان گریب آباد ءَ تیرگْواری کُرتگ ءُ کشندہ ٹولی ءِ کارمند لتیپ ء جلیل ءُ امان اللہ ء ھسین کُشتگ اَنت ءُ آسپ ء دلمراد ٹپی بیتگ۔ مُرتگ ءُ ٹپی بیتگیں کشندہ ٹولی ءِ کارمند ایم آئی ءُ آئی ایس آئی ءِ جوڑ کنگ بیتگیں پرید ٹولی ءَ ھوار بیتگ اَنت ءُ آئی ءِ نزیکیں مردم بیتگ اَنت۔
جارکش ءَ گوشتگ کہ بی ایل ایپ باپاری مردماں کڈن کنت کہ آ ریاست ءِ کمک ءَ یل بہ کن اَنت اگاں باپاری ءُ ڈرائیورانی روِشت ھمے وڑ ءَ برجاہ بوت اَنت گڑا وتی تاوان ءِ زمہ وار وت اَنت۔
آئی ءَ گوشتگ کہ بی ایل ایپ ھما دُرسیں مردماں تچکی گْوشگ لوٹ ایت کہ ھرکس ریاست ءِ لوٹ ءُ واھگانے پد ءَ سرمچارانی چاریگی ءُ لس مردماں دلسیاہ کنگ ءَ اَنت، ما آیاں موہ دئیں کہ ریاست ءِ کاراں گستاہ بہ بنت اگاں نہ پہ وتی آسر ءِ سر بیگ ءَ جاڑیگ بہ باں۔
جارکش ءَ گوشتگ کہ گل ءِ اھوتی ٹولی ریاست ءُ ریاست ءِ کمکارانی سر ءَ چم سَک داتگ اَنت ءُ بلوچستان ءَ ھرچ کجا بیتگیں وئیل ءُ جاور چہ اھوتی ٹولی ءَ اندیم نہ اَنت۔
میجر گھرام ءَ سے ئیں ارشانی زمہ واری من اتگ ءُ گوشتگ کہ دیمتر ءَ گوں تُرندی ءَ اُرشانی برجاہ دارگ ءِ کول ءَ کن ایں۔
